呢排炒賣唔順手，前日買入恒指Put輪9775，點知當晚美股就急升，心諗唔通真係咁黑？噚日一早走上股票行，諗住一見恒指升穿20日線8722，隻9775就要跳車，點知恒指最高只係升到8654就無以為繼，最後重要倒跌52點收場，隻9775反升逾4%。
尾市曾考慮沽出9775食胡，因為美股個勢幾好，杜指昨晚若升破3頂阻力8520，港股今日應有反彈。但趙飛雲諗起董特首昨日提出嘅118億元救市措施冇乜料到，刺激經濟作用有限，反而加大財赤，故此決定繼續揸住9775，以恒指升破20日線止蝕。
大市氣氛唔好，不少有質素之二三線股隨市下跌。趙飛雲雖然做緊淡友，但亦覺得𠵱家應該搵定啲優質工業股，吼位買平貨，揸佢一段日子，應有理想收穫，對象之一係剛公布業績嘅海域（1220）。
海域主要產銷鋁型材料及電鍍金鹽，02年度營業額躍增4成，達14.2億元；盈利方面，儘管要為藍帆（8166）作最後一次撇帳近3100萬元，是年度盈利仍保持億元以上，實在不俗。03年度相信再無類似撇帳，即使業績只是維持，盈利已可增長兩三成，更何況集團業務正高速增長。
海域今次派成績表，最令股東高興的是派發末期息7仙，以昨日股價1.32元計，息率5.3厘，相當吸引，趙飛雲準備吼住喺1.30元樓下入貨。
趙飛雲