「五年前，我發覺個仔愈大愈唔聽話，於是日諗夜諗教仔良方，不如試吓同佢一齊玩模型車，至少我一定見到佢留喺屋企砌車，又可以一齊去車場鍊車，應該無機會學壞！點知一畀佢玩，佢就瘋狂愛上呢個玩意，重愈玩愈精，技術早已超越我呢個老手。」玩模型車二十幾年的譚振雄，無心插柳，竟然就這樣造就了兒子樂文為港爭光。
2000及2001年，譚樂文奪得全中國模型車比賽冠軍，去年十一月，又在「日本田宮世界盃」奪得第一名。「因為佢，我更成為廣州隊模型車教練，等咗二十幾年，終於將興趣變為事業，好開心！」說起兒子的佳績，譚振雄一臉滿足。今時今日，仔仔固然沒有學壞，父親反而從兒子身上學到更多。「還記得初初砌車比賽，成日都同阿仔嘈，因為我覺得佢比賽嗰時唔識執生，冇盡力，我明明砌咗架性能一流嘅模型車畀佢，都攞唔到理想成績，但佢就駁嘴。「係呀，我同老竇講，落場嗰個又唔係你，你都唔知我有幾驚，好多時都有意外。」樂文笑着話當年。於是父親明白了，並非有一架高級賽車就一定贏，原來比賽隱藏了很多未知之數！
父親把鬥車的理論，套用到人生。「經過幾次鬧交後，我明白唔係我砌部乜車，佢都啱用，技術係要靠互相了解先有進步！正如當前香港所遇到的難題，如果中大港大可以一齊互相研究『沙士』資料，應該可以更快解開困局！
「講到尾，砌模型車比賽同做人一樣，好多時都係落到場先知個環境係點，最緊要帶齊『架生』，隨機應變，就話之佢係地氈、瀝青或泥地，都可應付自如，乜障礙都可輕易跨過！」聽落有道理。不過，都是這句最有意思，「邊有人一世風平浪靜？咁順利，生活又點會精采？」
記者：梁佩芬 攝影：陳陶鈞