一場非典型肺炎嚇怕港人，雖然腦場不例外地減少人流，不過情況已比其他行業稍勝，放工、放學同假期照舊熱鬧如昔，可惜始終旺丁唔旺財，過往勤於升級超頻嘅砌機一族大多得個睇字，出新機人數亦貼近歷年新低點，減價促銷似乎屬唯一求生之道。
記者、攝影：徐影龍
好多人為免同屋企人爭電視用，都會添置番個TV-Box，用電腦個芒睇電視或打機。COMPUCON呢部17"芒過人之處就係內置TVTuner，可直插天線睇電視，跟機送埋遙控器。另外亦支援DVI數碼輸入及普通AV線，駁PS2打機都得。官方定價$3,790，旺電JUMBO平二百蚊，賣$3,590。
WinFast一向有唔少Fans，新卡340TDH採用nVIDIA最新嘅GeForceFX5200晶片，支援DirectX9.0，配合內置128MB記憶體，打機效果一流。另外重有齊DVI及TV-Out插頭，由初初$990賣到家陣只係$760，新卡嚟計已算幾抵玩。
Intel目前最快嘅桌面電腦處理器P43.06GHz，獨有CPU一變二嘅HT技術，可惜初發售時賣價高企，冇咩人砌機會用佢。近期終於出現減價，由最高峯嘅$5,050，跌到家陣嘅$3,350，跌幅達三成，買埋底板都係四千零蚊，相信會吸引多啲人升級。