「老公為令我安心，自己下禁制令，『沙士』一日未走，都唔會同豬朋狗友落Bar劈酒！可是，在單調乏味的日子下過了一個月，他開始雙眼發呆、說話無味又思緒混亂，平時活力充沛又口甜舌滑的他，去了哪裏？為找回真正的老公，兼要逗他開心一番，我決定今日犧牲少少Shopping時間，將屋企變酒吧、自己變索女，勢必令剛放工回家的老公好驚喜！」大家不妨睇睇呢位老婆Pricila有乜計。
記者：梁佩芬 攝影：林栢鈞、黃子偉
Model：Pricila、Teco（K-one） 鳴謝：鸚鵡吧
首先要同屋企嚟個大變身，落Bar要講Mood，屋企啲電燈非常光猛，又怎能與Bar相比。要做到效果突出，一盞盞七彩顏色轉轉燈就搞掂。賣燈嘅老闆點醒Pricila：「我哋叫呢啲燈做『龍球』，其實盞盞燈Walt數都一樣，都一樣咁光，有大、中、細三種Size，如果屋企得三百零四百呎，細Size即直徑20cm就OK，另外兩種25cm同30cm，就會太大，啲燈光會睇得唔清楚！」原來買盞燈都咁多學問！第二招係貼星星，一包螢光星星貼滿牆，加幾分浪漫感。Pricila提醒大家，要趁老公未回家前，先着燈照數小時，令螢光星星吸滿光後，一熄燈就會發光。
屋企變完身，又怎可以讓自己的一副黃面婆尊容大殺風景？肯定要執執佢老公先夠驚喜，不二法門，行性感！平時老公落吧，一定會話無乜靚女，咁當然係點你，至少都有啲着TubeTop、露出小蠻腰的啤酒女郎或女拳手在場。所以一於有樣學樣，搵番件TubeTop撐撐場。但各位老婆要小心，呢招唔係人人啱，要露兩手唔係自暴其醜，所以低胸定露腰、抑或只係Show腿，就要諗清楚，免得變成大驚嚇。最後再來個冶豔化妝，這突如其來的新形象，老公又點會唔雀躍！
落Bar又點會少得飲兩杯，不過買啤酒就似乎太普通，要炮製一個難忘的夜晚，就一定要重點出擊，要搞到甜蜜得嚟又火辣，飲大兩杯就梗係會……Pricila諗起都心甜。當然佢早有準備收晒風，專業意見再加入少少創意，就搞出幾杯令人神魂顛倒、渾身是火的特製飲品供老公享用。
火辣酸梅湯幾啖眼花
五種最「掯」嘅烈酒，包括：伏特加、氈酒、龍舌蘭、冧酒及君度，混合可樂及檸檬汁，顏色及質感看來像酸梅湯。入口酸酸甜甜，老公飲多幾啖後，就有火辣感覺，又有點頭暈眼花，再加上你妖豔的裝扮，完全像置身在酒吧之中。
雞蛋酒好補身
好了，係時候補補佢啦！聽講雞蛋就最好，用白蘭地加生雞蛋再加7-up。雞蛋入口又滑又好味，又可以借題發揮，乘機推介你嘅白滑肌膚。
烈酒大混合一飲即㷫
又係用火辣酸梅湯嘅五種烈酒混合，再加埋白酒，與之前的火辣特飲最不同是，因為酒精度極高，老公第一啖入口，會覺得苦苦哋，不到五秒，就全身㷫烚烚兼暈陀陀，再加埋你嘅媚功催谷，老公一定暈上加暈！
做戲都要做全套，又扮女拳手，又自製特飲畀老公，點少得猜番兩板枚，經Pricila深入調查，骰盅同啤牌，永恒的酒吧玩意，又Hit又簡單嘅呢兩款，就俾你偷偷師。
幸運骰
落吧應景玩意，唔少得。「幸運骰」玩法如啤酒的「鋤大D」一樣，睇吓邊個可以喺五粒骰中，搖到「套啤」、「三條」及「四條」。如果兩方乜都無，就將點數加起，邊個大就贏！
鬥大
鬥大重易玩，每人抽一隻啤牌放喺頭上，先設計輸咗要罰乜嘢。大家只係見到對方有咩牌，唔知自己係乜牌，開出懲罰方法時，就要睇睇對方有幾多斤両啦。呢招用嚟調情就最啱，想有下文，就要罰得夠技巧！