貪靚不嬲係女人嘅天性，最近啱啱成為咗DiorSnow護膚品同化妝品代言人嘅奧菜惠，當然更加要出力keep住個靚樣啦！所以早幾日佢專登飛咗去上海三日，試勻晒內地著名嘅美容瘦身秘技，不過佢話針灸完二十鐘之後，對美腿即刻瘦咗兩cm喎！會唔會誇張咗少少呀？
針灸
幫惠妹針灸嘅李醫師好出名，喺上海中醫藥大學附屬嘅曙光醫院任職，佢當日一見惠妹就問：「是否想變瘦？想瘦哪兒？」跟住佢摸一摸惠妹隻腳，即刻就知佢壓力好大，重叫佢要小心身體㖭！
而惠妹話試完呢個奇妙療程之後，領悟咗一個大道理喎！佢話：「要靚，真係要由內到外㗎！」
拔罐
咪睇惠妹連針灸都唔驚就好大膽同忍得痛，佢試真空拔罐嗰陣就嗌痛嗌到拆天咁啦！不過惠妹事後居然話：「痛一陣之後感覺暖暖地，似乎會上癮！」
腳底按摩
腳底按摩一向好得日本人歡心，惠妹當然唔會放過，佢試完之後重話唔多覺痛㖭！真係厲害！
熱石按摩
最後惠妹又去到堪稱上海最貴嘅GrandHyatt酒店做Spa，做做吓熱石按摩嘅時候，重舒服到瞓着咗，真係好識得享受喎！