港府118億元紓緩肺炎疫症困擾措施終於出台，財爺雖口口聲聲希望可振興經濟，但港股冇反應，不但唔識跟美股升，重要倒跌52點，恒指收市報8519，成交80.87億元。其中以電訊股沽壓最大，中移動（941）跌2%，收報15.20元，成交高達4.15億元。中國聯通（762）更下挫3%，收3.95元，成交9831萬元。
中移動公布首季業績後，市場普遍預期中移動其後嘅季度盈利會出現倒退，因而導致外資減持，一波更叫客戶在中移動跌至12.50元才入市吸納。嘩，原來佢哋重睇得淡過阿虎，如果中移動跌至12.50元，恒指至少要跌185點，連同其他藍籌跟住跌，港股可能要見8200水平。
民信集團（547）早前有19.26%股權，以每股5仙轉手予AngloJapan。黑客話，新管理層入主董事會接手公司，當然會有連串動作跟尾，可惜三軍未動，糧草要先行，現在正盤算要在市場抽幾多水來投資新項目。據講新大股東有意增持，所以民信可能進行供股，並由大股東包銷，由於現時小股民多數唔願畀錢供股，大股東可藉此增持股權。
和黃（013）行使認股權證向和記港陸（715）注資近4億元，並增持至58.12%。市場隨即憧憬和記港陸會有新搞作，刺激股價升5.15%，收報0.51元。
黑客話，和記港陸本身搞玩具生意，但同時攞唔少錢投資證券，01年年底有現金連證券投資逾10億元，基本上資金不缺，就算等錢使都毋須和黃注資。不過，由於有關認股權證下月到期，行使價為每股0.39元，較市價有頗大折讓，作為大股東嘅和黃冇理由唔行使換股權，大家毋須太敏感。
阿虎