隔晚美股似模似樣，好友估話港股都會有啲睇頭，結果又係空歡喜一場，恒指埋單唔見52點，早段高價攞貨嘅去到尾市又唔見錢。
大隻藍籌最出色嘅係電盈（008），一路穩如泰山，高收4.80元，有3.8%進帳，成交由唔夠5球激增至接近17球，有4件電盈Call輪打入威水榜，佢哋係9766、9662、9791、9762。
若然想博電盈再升啲，9791比較啱啲，明年3月到期，現價96仙，溢價13.8%，槓桿率5倍，數據比較實際，其他同類輪，溢價嫌太高。所有電盈Call輪，成交都好疏落，相當難炒，若然真係對電盈有信心，倒不如直接揸正股。
其他上榜嘅窩輪，有杜指Call輪9681，升25%，做咗阿1，不過成交金額唔夠3萬銀，另外1隻9747，冇成交，買家掛高13%。美股就算上升而又睇中，都好難喺本港窩輪市場搵銀。
國內非典型肺炎個案大增，公路股冇運行，驚住公路使用量大減，PE最高嘅滬杭甬（576），散得最厲害，前日唔見4.1%，昨日再跌8.6％。相關Call輪9703同9748，分別大挫40%同37%。9703今年10月夠鐘，溢價28.5%，9748今年11月夠鐘，溢價更加到37.4%。咁嘅溢價，好難有作為，除非正股忽然轉頭大升。
章盛