陳慧珊昨日以代言人身份出席護膚品牌Neutrogena最新美白產品宣傳活動，女藝員劉綽琪穿低胸上衣酥胸半露任大會司儀，搶盡主角陳慧珊的風頭。陳慧珊斥責食肆不注重清潔衞生，她說：「呢啲係一直存在嘅問題，唔應該等有事先關注。」
陳慧珊昨日以代言人身份，往跑馬地Teca餐廳出席護膚品牌Neutrogena最新推出的EssentialSoy美白護膚產品宣傳活動，稍後伊人更會為新產品拍攝廣告。
無綫女藝員劉綽琪任大會司儀，身穿黃色低胸上衣襯白色長褲的她酥胸半露，有走光之嫌，搶盡主角陳慧珊風頭。劉綽琪對此說：「我黐咗膠紙先出門，做足防走光措施，我唔係有心搶鏡，係大會要求我着淺色啲嘅衫，我見夏天就嚟到，性感啲都冇所謂啦。」
昨日陳慧珊即場與Teca的廚師合力炮製兩款由豆奶製成的食品與飲品，包括豆腐布甸及番茄豆奶。談到近況，她表示新劇要下月才開工，加上非典型肺炎肆虐，她減少外出，又更有規律做運動，她說：「我𠵱家每日出街跑步個半鐘，已經成功減咗五磅啦。」
問陳慧珊非典型肺炎有沒有影響她的生活？她說：「我一向都好注重衞生，𠵱家一返屋企就洗手，日日戴住口罩，戴咗口罩唔使化妝，皮膚重好咗㖭。其實我覺得香港嘅衞生水平一向都麻麻，尤其係食肆，我見過有啲食肆嘅人用同一桶水洗碗，咁樣真係好唔衞生。」
陳慧珊續說：「換轉喺美國，啲食肆係規定洗碗嘅水要有一定溫度，咁先殺到菌，我覺得呢啲係基本衞生問題，唔係等到有事先至識得關注。另外，我出街同人食飯一定會用公筷，如果同枱嘅人用自己對筷子喺度『撩吓撩吓』，我寧願叫過另外一碟餸。」
至於護膚心得，陳慧珊表示自己在飲食方面十分檢點，她說：「我已經戒咗食啲煎炸、多油嘅食物，凍飲同汽水亦戒埋，平時多數飲煲滾嘅水同蜜糖加水，當然徹底清潔都好緊要啦。」
採訪、攝影：DebbieLum
