楊永強最近忙於對抗沙士，估唔到佢重有心機扮靚自娛。噚日特首喺政府總部宣布救市措施，楊局長企喺一眾財金官員中間，零舍醒神，因為佢以棗紅色袋巾配銀灰色西裝，加上紅黃相襯領呔，非常搶眼。
記者會完咗之後，有個追住楊局長問問題嘅記者行家忍唔住讚佢：「你件西裝好靚噃！」佢即時心花怒放，答話：「係咩？好過平時灰灰黑黑嗰啲哦呵？」記者再讚多句「真係襯得好靚！」楊永強更笑不攏嘴，一直保持左手插袋嘅有型甫士行返辦公室。
有記者想問返正經問題，楊局長亦笑笑口咁答：「一陣就知，𠵱家唔係訪問嘅時間。」不過佢最終仍然肯答，話買口罩同防護衣嘅兩億未用晒。原來楊局長嘅死穴係貪靚，劉慧卿下次批評佢之前先讚吓佢嘅衣着，咪冇咁易激嬲佢囉。
傳真︰2623-9278
電郵︰