鄭大班發動「一人一樽維他命C」運動，送畀全港中小學生，點知全香港都冇貨，小小超李澤楷聽到之後，即向加拿大Jamieson藥廠訂購五十五萬樽百粒裝維他命C，噚日啲「丸仔」空運到港，大班、小小超同李國章局長，齊到機場貨運站驗收。
剛剛返港嘅小小超話，今次唔用電盈名義捐，因為上市公司資金係股東嘅，所以私人出錢，佢會睇情況決定加唔加碼。至於今次用咗幾多錢？據大班講，未計運費，批貨已經值成三千萬港元。
另外，小小超又畀錢印咗百五萬份健康指引同一百萬份體溫記錄卡畀全港中小學生，所以捐款實數係幾多，只有小小超先知。
呢批丸仔下周一開始，由德強物流義務派發到全港中學、特殊學校同國際學校，有剩嘅會派畀公共醫療機構醫護人員。
（圖）小小超（中）、鄭大班（右）同李國章（左）齊齊驗收維他命C，下星期各位同學就可以收到。
易仰民攝
傳真︰2623-9278
電郵︰