還以為銅鑼灣波斯富街和駱克道一帶的食肆，已經水盡鵝飛，點知大前晚走一趟，出奇地熱鬧，部份店舖重多人到要等位，誇張？非也，最大因由原來是其半價菜，各酒樓現在都提早喺晚上九點鐘供應消夜小菜，全部$18-$38，採訪百里鮮嘅老闆時話：「只係想旺丁唔旺財。」
記者：黃思濃
攝影：黃子偉
郭先生一向從事海鮮買手，轉眼已經十幾年，現兼任酒樓老闆之一，佢話：「咁多年嚟，我朝朝五點鐘就去到茶果嶺、鯉魚門入貨，一定會揀最新鮮最靚嘅海產，其中嘅招牌菜鹹蛋黃炒海蝦，往日賣58蚊一碟，𠵱家賣28蚊，好多客人一嚟到就必然望吓魚缸重有無游水海蝦，坐落就嗌呢味餸。」
郭生引領小記去睇魚缸，佢用網一手撈起啲海蝦，都係好生猛嘅中蝦，佢話：「每晚我哋賣幾十斤㗎！重有一味餸係蒜茸勝瓜蒸膏蟹，由68蚊減到28蚊，喺現階段的確係蝕本！」
小記以為，蝦、蟹喺香港哋好普通，不過要喺酒家入面食到品質靚嘅中蝦，兼且又肥到漏油嘅膏蟹，一定有賴精明嘅買手。郭先生從做買手起升做酒樓話事人，即使去年市道不景，酒家營業額仍然增加兩成，食客亦多了三分之一，所以他即使降價招客，仍然有利可圖，看見魚缸上「天下第一鮮」的牌坊，說酒樓是「天下第一廉」，相信亦不為過。
當侍應捧住呢味餸嚟到枱邊時，已聞到一陣香味。咬落蝦殼香脆，蝦殼外嘅鹹蛋黃好惹味，我覺得食呢味菜，叫多支大啤更正！
兩隻膏蟹，殼入面都係肥膏，盤底隔住勝瓜清蒸，膏蟹嘅鮮味被勝瓜吸收，食完膏蟹再嘗勝瓜，清爽又鮮甜，食完一隻已滿口汁。
食客Annie：經常嚟幫襯，最鍾意就係碟鹹蛋黃炒海蝦。
百里鮮海鮮火鍋酒家
地址：銅鑼灣告士打道250號伊利莎伯大廈一字樓
電話：25910363
嗰晚小記同埋一位喜歡滬菜嘅老友，一齊上去標榜平價嘅「貴軒」，50款碟碟18蚊嘅小菜中，叫咗三味菜、三支大啤，竟然食唔晒！要推介其中嘅砂鍋雲吞雞，同以前食開嘅上海舖，料一樣足，但價錢就肯定前所未有；至於翡翠花枝片和粟米斑塊都好夠份量。
有啲人可能會咁諗，橫掂夜晚九點開始就有咁多抵食嘅平價消夜，不如就捱多一陣肚餓先食晚飯，所以呢幾家酒家喺呢段非常時日，一直都咁旺場。
呢味係正宗上海菜，上海雲吞、白菜，大件抵食，其他上海菜館咁嘅價錢唔使諗，雲吞無梘水味，而且滲入咗雞汁味，真係「零舍不同」！
最怕花枝片咬唔爛，呢度蘸汁連花枝片入口時只覺爽脆，而且出奇地鮮甜，再點埋些少蝦醬，正！
食客陳先生和麥小姐：今晚叫咗幾味消夜小菜，真係好抵食。
貴軒海鮮火鍋酒家
地址：香港軒尼詩道489號銅鑼灣廣場第一期5字樓
電話：28380376
區內另一間好出名嘅「太湖」近日亦推出非常抵食嘅消夜新口味，例如台灣式瓜炒海瓜子賣28蚊，半隻脆皮琵琶雞賣38蚊，陳皮皮蛋泥鯭粥或薑酒煮雞雜重賣10蚊。喺半夜三更嚟到品嘗呢四味菜，埋單都唔使一百蚊，往日？路過時如果銀包肯定無隻「金牛」，又點敢行樓梯上樓呀！
呢味餸加咗一啲香料「九層塔」，味道好特別，就如台灣小食炒蝸牛，通常都加好多九層塔一齊炒，用海瓜子炒就更惹味。
端上枱時仍然蓋着，一攞開瓦煲蓋，一股濃郁嘅燒酒味直撲入鼻內，亦同時辟去雞雜的雪藏味，是$10菜中最值得推介的一味。
太湖海鮮城
地址：香港銅鑼灣波斯富街27號
電話：28930822