每年五窮六絕（即五、六月），全球Game界普遍性不景氣，香港今年情況更慘淡，最前線嘅Game舖首當其衝，不論熱爆勁Game定冷門貨，舖頭都坐咗唔少貨，願意平價促銷。今日我哋帶你掃盡港九平Game，兼且全部以「蘋果特惠價」開賣，讀者只需喺4月24日至5月1日一星期內，手持當日嘅《蘋果日報》，便可以超級特惠價錢買到心頭好。先旨聲明，數量有限咋。
記者、攝影：徐影龍 ImageGirl：小蕙
港島區搵嚟東方188嘅DreamStore做特惠Promote，呢間Game舖似乎對CAPCOM特別支持，首輪優惠貨品全部以CAPCOM大作為主，兼且搭埋攻略本賣，唔怕打唔爆機，尤其如《龍之戰士5》般長篇故事RPG，有攻略本點都打得輕鬆啲。最正係連攻略本嘅套裝賣價都比市價平，差不多等於買Game送攻略本，而《KingdomHeartsFinalMix》加《UnlimitedSAGA》套裝更係買一送一咁滯。
除一堆CAPCOM遊戲外，DreamStore重有唔少硬件做優惠。最搶眼首推由名廠ASCII製造嘅PS2手掣，外形仿似DC手掣，嫌PS2設計手感不佳嘅機迷值得一試，而且由市價$100減到半價賣$50，咁嘅價錢買個雜嘜都未得。另一樣抵玩套裝係GAMECUBE加《薩爾達傳說：風之指揮棒》，連埋變壓火牛只賣$1,280，街價差不多要成$1,500。其他如GBA遊戲都有優惠，不妨親身落場慢慢揀。
售賣點：DreamStore
地址：灣仔東方188商場256號舖
查詢電話：25753285
嫌唔夠喉又冇乜心水正Game？唔緊要，今日重搵嚟旺角好景商場嘅S.T.GameShop搞優惠，實行掃完灣仔再踩埋落旺角。近排人氣大盛嘅GBASP，全球銷量報捷唔憂賣，S.T.GameShop一樣照平畀《蘋果》讀者，$790送屏幕保護貼兼包埋220V變壓火牛，可直插屋企電掣充電，毋須再怕大意而燒壞機。新Game方面較搶眼有SCEH力谷嘅全中文化新Game《阿格斯戰士》，全3D動作類型，勝在爽快剌激，官方定價$218，而蘋果價有六折，賣$138。萬眾期待嘅RPG大作《StarOcean3》俾《真．三國無雙3》同《機戰αII》兩大作前後夾擊而影響銷量，趁住家陣冇乜正Game玩，值得入貨回味一番。
好歌不厭百回聽，出色嘅舊Game一樣值得捧場，而且賣價通常跌到無可再低，好多機迷就習慣定時搜括平價舊Game，用嚟儲都好，點都好過玩翻版。
售賣點：S.T.GameShop
地址：旺角好景商場一樓34號
查詢電話：23882109