派息率高到你唔信嘅嘉利國際（1050），噚日失驚無神發通告，話惠理基金揸咗6.59%股權，成為主要股東之一，跟住重話截至去年12月底9個月嘅營業額，較上年同期勁升72.8%。
雖然公司通告講明，9個月業績正斗，唔等於全年業績一樣咁靚，但無端端出個咁嘅通告，似乎有晒命之嫌。因此市況雖然低迷，嘉利噚日最高亦見過1.66元，收1.63元，升1.24%，但成交則唔夠1百萬元。
經紀陳話，記得金融風暴之後，嘉利曾經一度想賣盤，但最終賣唔成，之後生意又好番。雖然隻股由去年初5毫子升上嚟，但現價PE只係7.5倍，股息率高達17厘咁勁抽，如果過多兩個月，公布全年業績掂嘅話，𠵱家其實好抵買。既然公司都事先張揚，應該可以留意。
至於有基金揸重貨，究竟係好事定壞事？經紀陳就話兩面睇，好似佢之前炒過嘅宏通（931），業績交唔到功課，即刻被芬佬大洗倉，噚日又跌多18.2%，收0.229元，股價再創新低，睇見都心傷。
慕容小初