喺今屆美國紐約車展上，凌志展出咗一款名為HPX嘅概念車；此車可算係豪華SUV及高性能房跑車嘅Crossover之作；不但造型富活力感之餘，實用車廂配搭及強勁動力輸出，都會係佢嘅賣點之一。不如𠵱家一齊嚟睇吓，佢有何吸引力啦！
呢款由豐田位於美國嘅設計部門負責設計的HPX概念車，可謂係將豪華SUV及高性能房跑車設計概念集合於一身嘅Crossover之作，故此喺外形及車廂配搭上，皆流露有兩者嘅神髓，絕對係吸引力十足。車廂空間不僅寬敞闊落，加上前後三排承托力甚豐嘅座椅，乘坐倍見貼服舒適外，就連設備配搭亦見齊全；駕駛者不但可從設於表板旁嘅螢幕，得悉各項行車資料之餘，而中、後排乘客，更可透過設於車內嘅LCD屏幕觀看DVD電影㖭！
由於HPX概念車，係用上於美國市場發售嘅凌志GS430作為設計藍本，故此兩者機械配搭可謂十分接近；HPX將會以一台4.3公升V8DOHC偈作核心，除馬力輸出高達300匹外，匹配一套5前速自動波，性能表現可謂毋庸置疑。而四輪21吋輪胎配搭，加上出眾懸掛組合，亦能令呢款全新HPX概念車，可有出色循迹表現呢！