現在人人都要勒緊褲帶，不過窮則變，變則通！以前在大酒樓大魚大肉，𠵱家都可照舊，只不過換來自己煮。做咗酒樓樓面九年有多的荷姐，以她做酒樓多年經驗，自然有番兩道廚藝，等佢教大家用經濟自煮價食大酒樓菜式，實行慳錢之餘都有好嘢食！
記者：陳冰麗
攝影：伍慶泉
經歷香港經濟幾次起跌，荷姐也歎道：「非典型肺炎發生後，生意一日比一日差，以前金融風暴都會有人嚟酒樓食飯，𠵱家真係客都唔多個，我哋做樓面嘅都擔心唔知幾時會被裁。」
荷姐亦為自己未雨綢繆，緊縮日常開支，以前同屋企人定期出街食餐好嘅，家陣乜都要慳，但點都唔會刻薄自己同屋企人個肚，由她親自下廚，炮製大酒樓水準菜式，但就經濟得多。
做開酒樓，見盡亦親嘗過大酒樓水準的菜式，要以經濟角度將平凡材料煮出美味佳餚，對荷姐而言絕無難度。今日她將教大家用蛋、冬瓜及鯪魚三種材料煮出三種不同口味的菜式，兩餸一湯所費也不過十六蚊，重話足夠四人享用。菜式集香口、有嚼頭又清爽於一身，老少咸宜，對入廚初哥也絕無難度！非典型肺炎肆虐，自己下廚經濟之餘，又保健康！
這款奄列都算突破傳統，用中式手法去煮，加點葱及肉碎去煎，簡單卻不失香口。荷姐話兒時因為家境清貧，不能大魚大肉，而且葱並不值錢，幾乎買餸就有葱搭，為了物盡其用，媽媽就利用葱配以蛋煎煮，到有喜慶節日，則在葱蛋中再加入少許肉碎，對煎成荷包形。至於點解配上茄汁，荷姐解釋酸甜味令食落更開胃，茄汁配煎蛋味道可算是絕配，是她後期自己調配的食法，屋企人試過都話正！
有咩料：雞蛋4隻、肉碎2両、葱少許
荷姐話要在一般大酒樓食呢碟鯪魚肉炒椰菜的話，一般至少都要三十多元，自己煮當然平好多啦！七蚊都唔使，而且自己煮可以控制鯪魚肉餅的厚度，荷姐話，鯪魚肉要厚煎才有嚼頭，為慳成本大酒樓未必可以做到，自己煎一片片厚厚的鯪魚肉餅，配以椰菜炒，鮮甜又清爽，送酒或佐飯皆宜。
有咩料：鯪魚肉4両、椰菜10両、甘笋少許
現在當然最好食個冬瓜盅消暑，但屋企又無酒樓的大蒸籠，但荷姐話一樣無問題，只要變一變，將冬瓜化整為零，一樣可以享受同一風味。由荷姐加以改良過後的冬瓜湯，做法簡化了，冬瓜切粒粒，再隨自己喜愛加減材料，為了令單調色澤的冬瓜加添色彩，荷姐就想到加入顏色鮮豔的甘笋粒同煲，同樣保留肉碎，才似酒樓風味，減去火鴨絲，味道變得更清爽，營養卻更豐富。
有咩料：甘笋1條（細）、冬瓜半斤、肉碎2両
調味料：鹽、豉油、油、胡椒粉各少許