蘭西啱啱收到利嘉閣最新季刊，首次介紹中原集團嘅發展歷史，話說中原喺78年成立，當時只係喺中環舊萬宜大廈分租一張寫字枱。79年先喺士丹利街租第一個獨立辦公室。
唔講唔知，原來中原集團主席施永青曾喺80年離開過，佢為咗進修，將啲股份送畀拍檔王文彥嘅大學同學葉鎏欣，唔夠一年又重返中記，但係三名股東喺82年因意見不合，葉鎏欣退咗股。90年因為大量員工離去，公司改組，引入黃偉雄做第三位股東，持一成股權。
二十五年間經歷好幾個風浪，中記規模愈來愈大，屬下公司有成十幾間。不過，今次非典型肺炎對中記係一個新考驗，要開源節流，後勤三百幾名員工，下個月起減薪一成半。聽講，減薪後每月可慳番三十萬至四十五萬，一年就慳到三百六十萬至五百四十萬。
家陣做經紀閒閒哋要跟客幾個月，中原駿景園分行經理區偉基（Ray）就跟咗半年，至促成到大埔滌濤山3240呎洋房，作價1600萬，重幫個客解決咗幾個問題。買家原住九龍區，要經常上深圳，但仔女喺九龍上學，中原就幫佢搵校巴接送。阿Ray重載女主人大埔一日遊，介紹社區設施。又陪買家上深圳廠房，體驗所需時間，只係40分鐘。
疫情重係風頭火勢，好多會議同活動都要取消。美聯物業就推出網上培訓課程，等員工唔使親身去上堂，減少受感染機會，又可以喺任何自選時間內進修自我增值，一舉兩得，啱晒工作冇定時嘅代理啦。
回應客戶要求，配合需要，係各行業提升競爭力嘅不二法門。
蘭西最近收到希慎興業嘅年報，就有一個好例子，話說WillisChina（HongKong）保險公司，一直租用希慎旗下嘅寫字樓，計劃租約期滿時擴充業務，希慎為減低客戶的時間錯配，畀佢哋特別短嘅租約。
其間該公司落實多租六成樓面，希慎隨即提供新方案，終止未到期嘅租約，推介利園（圖二）寫字樓畀佢，唔使兩邊畀租咁傷。
中原黃金鳳話，自從肺炎事件爆發，各類零售商旋即加入銷售口罩行列，荃灣南豐中心已有約二十間舖，以短租形式，售賣相關物品，有經紀更一連促成九單呢類舖租，攞咗最多開單獎。
成為口罩零售點嘅荃灣南豐中心，舖位約三十到七十方呎，日租五百至一千五百蚊，以前租客多賣飾物、裝飾品，或做散貨場，𠵱家清一色賣「防炎三寶」。
蘭西
電郵地址：