華倫西亞同巴塞隆拿兩支西班牙球會於歐冠盃八強出局，兩隊教練對結局失望之餘，亦好唔忿氣，指對手只識踢消極防守足球，現代足球再係咁落去，只會趕走球迷。
我求大俠睇完呢兩場比賽後，都幾同情呢兩支西班牙球隊，尤其係華倫西亞的確大部份時間都以攻為守，踢出精采進攻足球，最後卻因為俾作客入球優惠條例擯咗出局，認真唔抵。
華倫西亞除咗教練賓尼迪斯外，中場維辛迪就更加激，詆毀國際米蘭係咁多年喺米斯達拉主場所遇嘅歐冠盃對手之中表現最差嘅一隊。當然，維辛迪嘅心情係可以理解，我求大俠惟有寄望祖雲達斯同國際米蘭喺四強時唔好踢得太過保守，悶親球迷。
我求大俠收到風，球王馬拉當拿安排咗兩個經紀嚟上海視察，有意喺中國起番間足球學校。據講，其實佢喺中國隊打入舊年世界盃決賽周後，已經有呢個念頭。有個咁威猛嘅人搞學校，唔多唔少會幫助到國家足運。之但係我就為呢兩個經紀擔心，呢個時候到大陸……
假如新特蘭喺禮拜六聯賽輸畀紐卡素，就係連續十三場聯賽輸波，真係十三不祥嘞。中場樸達感慨咁話希望贏到呢場東北打吡戰，等隊波降班都無咁肉酸喎。不過紐記急於搶分保前四，加埋對維拉頭破血流嘅舒利亞都無事出得，恐怕佢都失望居多。
雖然好多人都覺得國米晉級夠運，但托度嘅表現真係唔到你唔服。呢場波佢唔止上晒身，重因為唔滿意隊友迪比亞治奧無阻住人開罰球，拖吓時間，於是衝出去推撞對方。事後托度承認自己衝動。呢件事反映球場真係英雄地，球員投入起上嚟有時真係敵我不分。
係人都知傑特係個二十四孝老竇，去邊度都帶埋個四歲仔仔TJ。好以噚日網隊主場對公鹿場波咁，「傑仔」就坐喺場邊睇老竇打波，點知喺比賽尾段，傑特為咗飛身救一個界外球，竟然不惜將自己成二百幾磅重嘅身軀，好似大石砸死蟹咁壓住自己個仔，搞到「傑仔」痛哭失聲。傑特呢種「六親不認」忘我嘅精神，真係值得尊敬。
活塞一向以防守強見稱，但係喺季後賽第一場就衰咗，俾魔術得分王麥基迪轟入生涯季後賽紀錄四十三分，真係顏面冇存，搞到活塞班球員個個誓神劈願，話一定要喺第二場畀啲顏色佢睇。睇來第二場兩隊肯定打得勁火爆囉！
逢周一至周五見報