董特首日日命令衞生福利及食物局局長楊永強要做好醫護人員嘅保護工作，又親自去慰問佢哋，重成個老毛老鄧咁話：「你哋辛苦啦」。點知受感染嘅前線醫護陸續有來，噚日又多四名，你話老董幾冇面。
老董雖然咁錫楊局長，但八方睇怕係都唔保得佢幾耐。立法會衞生服務界議員麥國風誓言，好彩冇人（醫管局醫護人員）香咗，否則一定追究到底。佢重話，楊永強衰高傲，至搞到咁大件事，遲啲等件事告一段落，必然會做詳細檢討同佢算帳，大家坦坦白白講清講楚，究竟發生乜嘢事，邊個要負責，至於使唔使下台，佢就唔理得咁多。
咁咪即係秋後算帳？咁如果到秋天都未搞掂疫情，香港就真係慘情。
其實八方最想知道，點解啲前線醫護有咁多難題，但又冇人行出嚟講嘢。麥國風話原來佢哋都怕俾人秋後算帳，所以佢都好難做，最後諗到做不記名嘅問卷調查，但遠水不能救近火。
唔怪得咁多護士鍾意打電話上鄭大班個節目，一來唔使暴露身份，二來醫管局高層聽到佢哋嘅心聲，就立即有行動，唔使同啲醫院行政人員喺度嘥氣。
麥國風話，再冇醫護人員受感染，就係SARS有機受控之時，大家且放長雙眼睇睇。
八方一位喺大埔那打素做護士嘅老友形容得最好：「你要我哋上戰場打仗唔緊要，好似打伊拉克咁，但係你都要畀足夠子彈同埋武器。」
開頭唔夠口罩，之後又話唔夠眼罩，𠵱家重未有足夠防水袍，真係有冇搞錯！
傳真︰2623-9278
電郵︰