張藝謀嘅緋聞女友章子怡星途可謂一帆風順，加上佢又好識冧對佢事業有幫助嘅人，難怪佢長拍長有。
不過章子怡拍王家衞部《2046》，王家衞就話之你係天王巨星，都一樣冇面畀，聞說佢嚟香港開工之前，澤東公司特登搵專人教佢跳舞，因為佢喺部戲入面要同偉仔拍幾場跳舞鏡頭，點知導演睇完段片後，覺得唔係嗰回事，嗰啲戲份全部被一刀剪晒。
王家衞一向係追求完美嘅導演，如果佢覺得某啲演員嘅演出同部戲唔夾，就會「先下手為強」，佢都唔係未試過將人哋啲戲剪走晒，記得喺拍《春光乍洩》嗰陣，關淑怡嘅戲就俾王家衞剪清光啦！不過章子怡喺《2046》戲份好重，啲跳舞戲份剪晒之後已安排重新拍過，佢再拍嘅話怕且會捉到王家衞個feel啦！
非典型肺炎喺內地好嚴重，但陳敏之就冇有怕，佢喺復活節嗰幾日去咗寶安縣登台，全場爆滿。陳敏之一向有潔癖，出場前洗咪又換咪套，用晒消毒藥水洗手，佢見到內地觀眾冇戴口罩都幾驚，但係當佢見到啲觀眾對佢好熱情，就好開心喎。不過佢一表演完就即刻離場，亦自備毛巾用品去酒店用，連枕頭被袋都帶埋，真係好小心㗎。
黎明喺新片《雙雄》入面飾演一位心理學家，日前導演陳木勝就同一眾演員黎明、鄭伊健、吳鎮宇喺葵芳寫字樓開會。導演嗰日重邀請咗心理學家楊博士出席，楊博士預備咗好多資料畀黎明參考，佢以前幫警方偵破唔少案件，包括屯門色魔同寶馬山雙屍案等。而鄭伊健喺片中就做警察，亦係第一次同黎明合作。
陶大宇噚日喺大埔道北九龍裁判法院拍攝有線電視新劇《靈異偵緝檔案》，劇中佢飾演經常同死屍嘅殘肢為伍嘅差佬，重不時聽到屍體要求幫手伸冤，不過有次大宇竟錯手殺死一名女學生。大宇話唔怕因無法抽離角色而影響情緒，佢話：「我有排都未去到張國榮嘅境界，佢成就超卓好多啦，我未係佢嗰班。」
李克勤今個月會推出最新個人EP，喺經濟低迷嘅環境下，克勤好希望出隻碟可以帶畀人溫暖感覺，所以EP裏面收錄嘅歌曲，都係環繞友情、愛情同親情，正好表現出克勤係個重感情嘅人。克勤重會親自執筆，寫低佢對屋企裏面十件有感情嘅嘢，好可惜冇寫盧淑儀。
早前薛家燕（好姨）操勞過度病咗，同時驚聞《皆大歡喜》有女導演中招，嚇得好姨慌失失。好姨噚日病愈返廣播城拍劇，見佢掛住個空氣清新機，好姨話：「係個客送畀我，𠵱家重好似冇晒貨，話要訂。」而苑瓊丹就話用中藥內調防炎，佢重特登帶中藥返工，順便益埋同事。
