經紀黃噚日打電話畀小初，叫留意兩隻業務性質有啲相近嘅中國稀土（769）及亞洲鋯業（395），佢話兩股未來日子表現將迥異，前者就唔多樂觀，後者則好似想開車。
經紀黃話，中國稀土上個月表示會更換核數師，股價輾轉由1元樓上跌至0.90元樓下。噚日隻股停牌，經紀黃話佢在基金經理處收到風，好似話業績公布日期又有延誤，所以要停牌發表公告。
由於市場對民企股頗有戒心，加上中國稀土股價之前積弱，隻股復牌後，真係唔知會係乜嘢光景。
至於亞洲鋯業因為上市無耐，半新股通常業績唔會差，噚日公布2002年全年業績，盈利7251.2萬元，比上年升31%，兼夾有3仙股息派，照計夠晒條件炒作。
聽聞亞洲鋯業上市以來，一直有人睇住個場，至今仍未散貨，唔排除想借今次消息炒一轉，隻股噚日上升4.85%，收1.08元，今日或者會再抽高啲都唔定。
慕容小初