喺最近舉行嘅美國紐約車展上，日產展出咗全新、兼備受車迷注視嘅350ZRoadster開篷跑車；新車不但秉承原有350Z硬頂版嗰份高性能跑車誘人魅力外，高達287匹嘅狠勁馬力輸出，更教人留有深刻印象呢！
以外形而言，全新日產350ZRoadster開篷跑車與原有硬頂版相近，同樣來得極具吸引力，但篷頂則改為電動軟篷頂設計，開關時只需輕按設於車內嘅控制鍵，便可於20秒內完成整個過程，夠晒方便容易；另外，由於改用上開篷設計，所以車架會來得更見穩紮，從而予人有十足信心。當你打開車門，定會有一種似曾相識嘅感覺，皆因內裏配搭與現有硬頂型號一樣，以極富跑味見稱，除擁有具十足承托力嘅跑車桶椅外，中控台上更鑲以銀白電鍍裝飾，獨特吸引之餘，齊全設備配搭重好易用㖭！
然而，廠方則為其安排有一台編號為VQ35DE嘅3.5公升V6DOHC偈，作為動力核心，除馬力輸出高達287ps/6200rpm外，就連扭力輸出亦高達37.9kgm/4800rpm，輔以一套6前速手波或5前速半自動波，性能表現可謂毋庸置疑。新車將於今年夏季正式推出，未知香港車迷能否與其見面呢？