無處不在嘅「沙士」，令到呢個復活節假期唔少香港人都留港消費，怕搭飛機中招。其中最驚青嗰個可算係自由黨主席田北俊，佢取消咗去夏威夷享受陽光海灘嘅大計；田少話雖然航空公司保證搭飛機安全，但𠵱家高危時期，都係小心啲好，所以最後選擇留港消費。
民主黨同民建聯議員都冇外遊，馬逢國同何秀蘭亦話要留港消費，兩個人趁假期日日同屋企人出街食飯，為振興市道略盡綿力。何秀蘭重話一個人所費無幾，成日約朋友一齊出街「食大佢」：「我一個人食得幾多？搵多幾個人先得。」
立法會主席范徐麗泰就冇有怕，去咗美、加一轉，有人問佢何解咁大膽，佢竟然笑笑口話：「死唔係好可怕啫！」事關佢人生中已經歷過兩次生死關頭，第一次係割腎救女，第二次係乳癌侵襲，兩次佢都大步檻過，所以沙士對佢嚟講都唔係乜嘢大件事。
其他無懼沙士嘅立法會議員亦大有人在，余若薇去倫敦探女，今日至返歸；劉慧卿就飛咗去荷蘭攞人權獎；寶Baby李國寶同周梁淑怡都向立會請咗假出門，但去邊就唔知；霍震霆亦有外遊，但似乎只係短線，噚日已經見佢喺立會出現。
傳真︰2623-9278
電郵︰