非典型肺炎對樓市有幾大影響？高力國際研究及顧問部董事盧永輝就話，估計豪宅租金一年內跌10%。
佢又將非典型肺炎同九一一事件，及97金融風暴後樓市走勢做對比，指金融風暴發生後一個月，豪宅租金跌1%，其後跌幅不斷擴大，三個月跌6%，半年間挫15%，一年大跌27%。但係九一一事件發生後半年，豪宅租金跌7%，一年只係跌咗13%。
盧永輝話非典型肺炎爆發後第一個月，租金下滑2%，但3個月內料會降6%，半年係8%，假如疫情喺第三季受到控制，估計豪宅租金一年跌幅為10%。原因係非典型肺炎唔會引發長遠嘅結構性問題，所以影響程度應同九一一相似。
另外，高力國際嘅市場報告話，由於政府舊年推出救市九招，其後又宣布投資移民政策，令到今年第一季豪宅成交量顯著上升，傳統豪宅區以港島南區最有韌力，山頂區就差些少，造價喺第一季跌2%。
薄扶林貝沙灣喺復活節期間賣咗三十五個單位，以豪宅盤計，成績相當唔錯，比起唔少瘋狂劈價嘅細價樓重好賣，而且買家都好踴躍。
有份促成其中五個單位嘅香港置業，區域營業董事翁祥生話，有位客人趁假期首次入貝沙灣睇樓，即刻扑鎚以七百幾萬，買入五座中層B室，1687方呎單位之餘，重叫埋朋友一齊入市，呢位友人都算唔話得，即時以七百幾萬買入樓下單位。遲啲入伙後，約打牌打波就方便得多呢。
非典型肺炎持續，嚴重打擊各行各業，尤其零售同飲食業，生意額驟減，唔少商舖業主都應商戶要求，減租共度時艱。
英皇集團經理陳志凌話，佢哋灣仔總部英皇集團中心，同荃灣英皇娛樂廣場，都應租戶要求，寬減半個月租金以捱過難關，為期一到三個月。會先研究商戶經營嘅行業，睇吓嗰行係咪受影響，至會減租。已獲減租嘅首先係卡拉OK同酒樓飲食業。
前鴻運地產老闆田國強，公司結業之後，即加盟上海龍頭地產代理行金豐易居，負責開拓香港代理業務，新公司今個禮拜五開張，重喺金鐘萬豪酒店搞開幕禮，聽田國強講，會請嚟本地發展商出席，集團老闆重會親來港剪綵。
田國強話，到今月底總共會有3間分行開張，其中一間就喺鴨脷洲海怡商場嘅鴻運舊舖，聽講裝修同一般傳統代理舖唔同。
開張當日，金豐易居喺上海有個代理嘅新盤開賣，聽講預訂已經爆晒燈，重會請記者去上海睇吓。
政府公務員宿舍租金一減再減，噚日又有兩個物業減租，就係渣甸山畢拉山道111號同埋大坑道135號，分別減租二千蚊同二千三蚊。
畢拉山道111號有成十六個單位減租，減幅由4.9至5.6%，至月租3.38萬至3.885萬，呎租12個3至14個2，單位一律2750呎。
大坑道135號就得一個2469呎單位減租，每月2.97萬，減幅7.2%，呎租12蚊。
蘭西
電郵地址：
