紐卡素今屆英超表現一直幾穩，可惜近排唔多掂，隨時臨尾香，季尾可能連第四位都保唔住，到時下屆歐冠盃參賽夢碎，變成另一隊列斯就真係大煲嘞！
全球經濟蕭條，紐記喺英超嚟講算係大手筆球隊，今屆用咗成一千四百萬鎊買入巴布爾同活基治，諗住改善後防；點知未見其利已見其弊，計埋前晚主場打和維拉，紐記過去四場英超竟然只攞得一分，好哋哋嘅三哥位俾車路士搶咗，重唔止咁，已經三連勝嘅利物浦亦都追到上嚟，只落後紐記一分。
我求大俠真係要警告一下紐記球員，如果佢哋再唔爭氣，隨時第四位都保唔住，下屆歐冠盃參賽資格都冇埋，到時損失慘重，變成另一隊列斯；猛咁賣人，最後搞到要護級，以紐記呢間東北大球會嚟講，就真係該煨囉。
最近巴西有班生意佬，準備斥資一千八百萬美元，同聖保羅買斷佢哋位新星卡卡嘅轉會擁有權，原因當然係希望第日卡卡會以更高轉會價錢赴歐掘金，乘機賺番筆啦！不過我求大俠覺得，全球經濟衰退，𠵱家啲球會已少見動輒出過千萬鎊去買一個球員，呢個如意算盤未必打得響，一陣重連累埋卡卡轉唔到會，影響佢前途㖭！
噚日《洛杉磯日報》話NBA球星拜恩通知湖人嘅總經理，話佢決定唔會提早續約，理由係想測試吓自由轉會市場；但我求大俠好懷疑佢會唔會捨得離開，因為根本冇邊間有實力球會嘅薪酬空間可以「容納」到佢，我諗佢係想跳吓草裙舞，希望湖人「疏爽」啲啫！
些路迪喺周四足協盃大戰博維斯塔前，有前鋒瑟頓神奇地復出。呢位射手喺上月十六日手腕骨折，當時話佢肯定錯過呢兩回合大戰，點知佢突然好番，令些路迪今次多咗贏波籌碼。我求大俠正替博維斯塔擔心，因為佢哋要對住瑟頓同拿臣，隨時會喺主場收檔。
英甲樸茨茅夫同李斯特城升硬班，但後面要打升班附加賽嘅四支球隊亦都大定，因為第七位葉士域治落後第六位森林成五分。我求大俠諗第三至六位嘅錫菲聯、狼隊、雷丁同森林可以叠埋心水打附加賽，所以呢排佢哋有可能餘下兩周比賽留力，各位波友收到未呀！
國內嘅非典型肺炎疫情至今仍未受控，就連下個月七號重開嘅甲A聯賽都可能受影響，部份球會建議推遲賽期，而中國足協喺月尾開會作決定。我求大俠當然贊成押後踢，話晒保護球員同球迷的健康，萬一有國腳染病，錯過五月尾東亞盃就無謂啦！