日本組合TOKIO主音長瀨智也，呢排為咗力谷新劇《巨星夫婿2003》，再次化身主角櫻庭裕一郎四處出動，最近攝影大師篠山紀信就為佢嘅全新個人寫真集操刀，入面當然影到長瀨鬼咁性感啦，連佢腋下嘅長毛，都拍到好似隨風飄揚咁，滲出陣陣男人味，簡直令我羅拉神魂顛倒，興奮到嘔泡！
長瀨扮櫻庭裕一郎真係上晒腦，呢位櫻庭哥接受訪問時話，平時好少喺電視節目上面「碰見」長瀨智也，所以大家唔係好熟，佢又話知道長瀨係夾band喎，好鬼羨慕佢！
櫻庭哥又話，可以獲某女性雜誌連續三年選為「最渴望擁抱男人」冠軍感到好光榮，不過佢唔覺得自己特別sexy，只係話能夠有一副咁正斗嘅身材，全賴不停keep住健身喎！
講開長瀨，佢嘅TOKIO拍檔城島茂最近亦有樣學樣影咗一輯露毛照，不過肯定冇長瀨咁sexy，純粹搞吓笑！