遠在矽谷嘅生化科技投資專家Ｌ打電話嚟問好：「冇事呀？我哋呢邊睇新聞，香港好唔掂喎？」經國際傳媒大肆報道，外人以為香港已變成瘟疫城市，惶惶不可終日。我哋雖然痛心香港特區做唔成「超級曼哈頓」，反而變成「特級慢黑鈍」，但對住外人，都無謂鬧咯，反要讚番吓香港人幾努力面對逆境，醫護人員夠專業、水準一流，而且重有中醫藥可以預防SARS。
投資L話：「喂，呢邊美國啲專家認為SARS唔係咁嚴重嘅傳染病，休息充份，可以自動好番㖭。有一間生物科技公司DiscoveryLaboratories,Inc.製造一種『表面活化劑治療法』SurfactantTherapy，已進入臨床驗證階段，專對付急促呼吸症、肺部受損症，用嚟醫SARS都有可能，你哋不妨睇吓。」
左丁山邊度識睇，投資梁傳來DiscoveryLab.嘅一啲資料，講SurfactantTherapyandSARS，便順手轉去畀大教授，等佢參考吓。照計矽谷方面好多生物科技公司，如果SARS不止，繼續為禍亞洲嘅話，呢啲公司必定鬥快研究治療方法與藥物，希望賺番一大筆嘅。唯一嘅考慮，就係自二○○○年科技股爆破之後，VC公司（創業投資公司）㩒住荷包，唔敢放膽投資，呢類bio-tech公司可能搵唔到資金支持，香港嘅有錢人如果有遠見，大可擇肥而噬。最近啲微生物學家大出風頭，醫生都要當佢哋係黑霧中嘅黃燈，香港人以後應認真看待生物科技。