上回同大家提到，其中幾個有錢人玩超級跑車嘅新方法之後，相信大家仍然記憶猶新，今回不如探討一下，響財爺宣布大幅增加汽車首次登記稅後，市民嘅買車新習性啦！
其實市民買車新習性好簡單，就係有咁平得咁平，同一個外殼Size嘅，買最平嗰部就可以喇！從而盡量去慳番啲錢嘛！好似買平治S-Class就買S350、買E-Class買E240就夠喇！呢種時勢對平治、寶馬等代理都無大害，但對其他代理就可能會略有影響，就好似凌志咁，佢哋頂級LS系列只有LS430供選擇，若退而求其次的話，就只好揀ES300；不過LS同ES系列嘅外觀，基本上係討好兩班人，可算係針對唔同嘅市場，難以有所比較。
其次，庫房「喊窮」而令政府加稅，可謂全民有責，但問題係大家都覺得加幅過高。自加稅預算案公布後，已經一次過將整個汽車零售業同周邊行業推向懸崖邊，只要再輕輕「伸多一腳」，就包保必死無疑；此舉唔單止車行職員及代理商叫苦，連帶代理一直畀面嘅汽車雜誌及報紙廣告，都一下子唔見晒，做汽車傳媒嘅朋友更加唔易捱。
自稱公私「好分明」嘅財爺話估計增加汽車首次登記稅後，能為庫房帶來龐大收益，唔知佢有無做過統計，宣布加稅之後車市銷量跌幾多呢？現時不少汽車展銷場如圖中一樣冷清，可謂不足為奇。司長閣下可以話捐10萬元就10萬元、話捐30萬元就30萬元，呢種有錢佬心態，唔係加稅後香港車市嘅反應呀！
文：陳自齊