住宅樓市由一手主導，發展商一般都係搵幾間大行做代理，搞到啲細行變成「蜑家雞」。世紀21幾經辛苦，最後終於得到大行眷顧，可以代理一手盤，總經理鄧慶年話，近排佢哋嘅成績都唔差，淨係將軍澳廣場就做咗超過一百單。𠵱家幾乎絕大部份嘅一手樓，世紀21都有代理，中美兩大行又有新威脅嘞。
鄧慶年透露，淨係總公司（唔計加盟商）嘅一手經紀都有成二百人，雖然近排個市差，但公司準備請多幾十人負責一手樓。其他同行裁減嘅人，有啲就過檔世紀21。
總公司會提供call機畀一手組同事，發放資訊等佢哋知道最新形勢，兼收指令落地盤搵客。
呢類員工因為係無底薪嘅，做到成交至有錢落袋，所以拆佣比例就相對幾高，有七成，佢上司就分一成，其餘兩成歸總公司。至於同行嘅拆佣比例就只得三成。
非典型肺炎令本港百業蕭條，最即時同大家都諗到嘅，係飲食同零售業，但重有好多行業都大受影響。業內人士同蘭西講，佢有位做廚櫃嘅親戚，公司有幾間分行，最近生意差到成個禮拜得一兩張單，為減低開支，炒咗一半夥計，咪話唔慘情。原因係客戶諗到要開門畀師傅同工人出出入入，擔心一個唔覺意，搞到全家中招就大鑊，索性唔搞住。
蘭西聽講，近期灣仔區寫字樓租務成交突然多咗，但都係啲大搬細同貴換平個案。呢批租客租嘅係三四百呎寫字樓單位，全包月租每呎十蚊。當然都係啲唔使點見客，同講求門面嘅行業至可以咁做。
今個月樓市係點，相信發展商同代理都心裏有數，利嘉閣董事總經理何紹章（圖二）估計，公司佣金收入會少約三成。
何紹章話，已超過五名業主肯減租，幅度由15到35%，為期三個月，每個月可以慳番十幾萬。有四分一業主口頭回覆會考慮減租，但過咗復活節至有決定，當中一啲舖租特別貴嘅分行，業主可能會減足一年㖭，但幅度就細啲，只有10到15%。
利記共有五十八間分行，今次希望每月可減到四十幾萬舖租，等於總租金支出嘅12%。
王府井大街係北京最出名嘅街道之一，新地喺嗰度嘅新東安市場，唔經唔覺已有五年，最近搵清華大學做市場調查，抽樣訪問差唔多二千名消費者，結果有六成半係北京市民，唔少重係三十歲以下，教育水平係大專或以上。
調查重細微到連消費者來自邊區都問埋，分別有朝陽、海淀同東城區，其他省份以河北、河南同遼寧為主。
佢哋嘅消費模式，就集中購買服裝、鞋同皮具用品，重有就係飲飲食食啦。
蘭西
電郵地址：