余文樂、張燊悅、趙頌茹（阿Yu）同葉蘊儀等，噚日去咗上水廣場出席「一杯涼水送暖支援大行動」，即場義賣健康涼茶。佢哋個個都好落力，不過佢哋對預防非典型肺炎嘅意識就差咗啲，喺義賣嘅時候都冇戴口罩，其間又同fans握手同合照。
阿Yu話唔怕喺肺炎肆虐時期同fans接觸，佢話：「我唔擔心，我遲啲重要返內地做嘢。」張燊悅話自己患有哮喘，唔可以成日戴口罩，佢話因為肺炎事件影響，減少咗工作，賺少咗錢，所以要慳啲唔買靚衫喎。
而有一對仔女嘅單親媽咪葉蘊儀話：「我好擔心，就算政府話復課，但疫情未受控，我都唔畀仔女返學。」
此外，余文樂嘅緋聞女友鍾欣桐做纖體代言人，余文樂對此話：「我好耐冇見佢，呢啲嘢各花入各眼。我認為女仔肥瘦都冇所謂，唔係睇外表，最緊要相處到。」
張堅庭噚日到商台擔任嘉賓主持，佢對於老友李萬祺同余安安離婚兩個月一事，坦言唔覺得突然，問佢知唔知李萬祺同余安安之間係咪有第三者？張堅庭話：「鬼知咩，我唔問呢啲嘢。兩、三個禮拜前，我曾經同余安安食飯，當時李萬祺唔喺佢身邊，我知佢哋關係有啲緊張，而且李萬祺經濟有困難，我哋一班朋友之前都想搵佢傾偈，不過佢好樂觀嘅。」
人氣組合Boy'Z兩位成員張致恒（Steven）同關智斌（Kenny），噚日喺葵芳舉行「勁攬你簽名會」，吸引數百fans圍觀，有個男歌迷送咗個心形飾物畀偶像。Boy'Z同百多名歌迷喺台上擁抱，又派啲唔合規格嘅口罩畀佢哋，事前Boy'Z同埋歌迷抱抱前都有洗手消毒，又戴上口罩。Kenny喺台上雖然主動攬住幾個女歌迷，可謂豔福無邊，但佢竟然話：「佢哋好似色狼咁㗎！」
伍佰自從去年同滾石約滿後，佢女友陳文姵即刻幫佢接咗唔少工作，重係三個月內一口氣接拍咗三個廣告，伍佰因而進帳咗約三百四十萬港元。噚日伍佰喺台灣第三度成為台灣長青啤酒嘅代言人，佢喺兩位性感女郎陪伴下，坐住架開篷跑車出席記者會，成個占士邦咁款。
蘇永康自從去年在台灣接受勒戒後，近日終於成功申請台灣工作證，噚日佢由新加坡飛往台灣，宣傳新唱片。康仔一到台灣，工作人員即刻幫佢掛上平安符，祝佢一切平安。康仔以國語話：「這趟來台心情很複雜，因為香港疫情很嚴重，如果持續下去，香港就要垮了！」康仔重話自己接受咗兩次檢查，佢話：「很好，體溫也很正常。」
