小初放完4日復活節假期，人都特別醒神，希望各位股民亦精精神神，齊齊賺多啲。至於今個星期值得留意嘅股份，大家可以睇吓海域集團（1220），隻股假期前已見異動。
海域明日公布全年業績，由於中期盈利已經升近4成，全年業績斷估唔差，如果派息方面令人滿意，有望刺激股價造好。據聞鍾意買二三線工業股嘅惠理基金，都揸咗5%以上嘅海域。基金對公司派息特別敏感，如果稍有差池，隻股分分鐘被人掟，所以公司應該會識做。
另外，海域分拆旗下海域化工於主板上市一事，已經拖咗一段時間，期間又換過保薦人，但賓架老友講，已經搞得七七八八，應該就快有消息公布。計埋呢個因素，海域又多一個炒作藉口。
雖然家陣新股要圍飛唔容易，但估計人哋應該搞掂晒先至郁手，好似上次分拆藍帆科技（8166）咁，事前全世界都以為唔多掂，點知又搵到大陸客支持。
慕容小初