住家Fun:<br>床上全日有搞作搭帳幕睇星星

住家Fun:
床上全日有搞作搭帳幕睇星星

「放假總係唔願起身。」有乜奇?但Coco同Ricky兩口子竟然話要將賴床這個永恒定律發揚光大,一於在床上磨足1Day!當然唔單止喺上面瞓覺咁悶蛋,而是向大家推介床上遊戲一大堆,別心邪,全都只係浪漫搞作。究竟喺床上可以有乜創意?咁就要由食早餐開始……

記者:招佩珊 攝影:陳智良
Model:Coco、Ricky(SunSpot)
逢星期一至五刊出

心形班戟勁冧
床上浪漫第一式,食早餐。不過就要其中一人有所犧牲,Ricky已經早有準備,比Coco早起,皆因佢想畀Coco呢個煮飯婆一個驚喜。要唔離開張床太耐,食物就一定要現成。即食班戟,不錯之選,不過要再花點心思,搞到成個心形咁款,Coco見到一定開心。果然,Coco勁冧。



枕頭開戰當晨運
食完嗒糖早餐,Ricky一心以為要在床上度日當然就係繼續瞓覺啦!不過Coco就堅持要晨運,一手奪過Ricky的枕頭,大戰就立即展開!平日哪有這樣的閒情?Ricky立即應戰!他們提醒大家,話晒食完早餐,切忌立即就玩得太激,先講講情話調調情,一於抱着遊戲心態,增進感情。不過好勝Coco就一心要贏,結果就讓Ricky捱了一記「天殘腳」而投降。





護士誘惑玩情趣
床上午餐,一樣首選方便,迷你版杯麵最正,兩、三啖就食完一個兼飲埋湯,乾手淨腳唔怕瀉。
食飽飽,甜蜜搞作陸續有來,而且夠應景。Coco話要嚟招護士誘惑,Check吓Ricky有無發燒,於是扮晒護士又探熱又聽心跳,最後重話要打埋針,雖則是膠玩具,但Ricky一於陪佢癲,大叫好痛,咁先夠情趣!

TeaTime重溫往日溫馨
玩到攰,是時候唞唞坐底食Tea,下午茶的最佳選擇當然是蛋糕,細細件一啖一個,咁就唔會有碎屑散到一床都是。呢個時候,最好一邊食一邊搬番啲舊相出嚟回味,重唔夠SweetSweet?





扮露營回到拍拖時
話咁快又入夜,夜晚一般係浪漫時刻,床上過日辰遊戲進入高潮,一向鬼主意多多的Ricky話要讓Coco回味拍拖一周年那次露營,不過今次喺床上!咁都得?Ricky隨手揚一揚張被單,「我有計!」只見他左夾右夾,竟然搭了個帳幕,原來佢重事先買定會發光的星星,於是兩個人一起把星星貼到帳幕上,跟住就拎埋三文治當野餐。露營、野餐兼睇星,浪漫到暈。



3.唔使3分鐘就搭好個帳幕,記得要揀張深色被單,貼在上面的星星就會更加光。



雙人按摩浪漫升級
雖然Ricky一向唔愛蒲,好專一,不過Coco就決定玩到盡,今晚暫時變身做按摩女郎服侍老公。佢早就刨定書學手勢,一心諗住老公歎完後就傳授功夫,然後到自己歎,皆因按摩可以幫助修身同減肥。Coco呢招夫妻互按果然係殺着,結果係愈按愈甜蜜!咁跟住係點?你話呢?



店舖資料

(a)玩具反斗城(28811728)
地址:銅鑼灣皇室大廈3樓

(b)三聯書店(24123696)
地址:荃灣青山公路210號富華中心3樓