上周歐美股市造好，對港股應該有啲刺激，當然亦要睇埋昨晚美股嘅表現。但肺炎疫情始終令人擔心，加上中國縮短「五一」黃金周，一啲旅遊相關嘅股份，又要捱多一棍。恒指上周收8579，估計短期內上落一二百點，唔易淨係單邊移動。
炒上落，當恒指升之時，買恒指Put輪博個市回頭，對象有9751同9775。當恒指跌之時，買恒指Call輪博個市反彈。無論做好做淡，都咪將目標利潤訂得太高，𠵱家個市非常難搵食。
肺炎疫情未退之下，愈來愈多報道話電訊公司生意冇乜受到影響，相反啲人外遊大減，反而要打多啲長途電話，電訊公司反而得益，當然有啲電訊公司嘅漫遊服務，少咗遊客出國而受影響。中移動（941）上周收15.45元，若大市唔好，有機會下試月初15元（14.95元）低位，見低位，又可以博吓見底反彈，到時買啲Call輪，主角係最多成交嘅9773。隻輪9月到期，現價18.1仙，溢價9.5%，槓桿率8.5倍。
中銀（2388）呢排勢弱，上周收7.75元，揸Call輪處捱打之勢，遲吓除息，亦不利Call輪，要避開。若然正股好番，重見8字以上，則吼位買啲Put輪9653。
章盛