近日非典型肺炎肆虐，令人較前更注重環境衞生，而空氣質素更係重點之一；較早前，我哋曾為大家介紹嘅萬事得M62.3SportsWagon，原來佢嗰套恒溫冷氣系統，經已配備咗空氣過濾器，對車主嘅關懷可謂無微不至。
呢套空氣過濾器並非一般過濾器，而萬事得更將之改名為「LIFEBREATH」。原來，我哋日常呼吸嘅空氣中含有所謂嘅乙醛，如吸入過多足可令人頭痛或頭暈目眩。日常生活中嘅香煙亦包含有乙醛，如車內嘅煙味未被過濾，香煙中嘅乙醛便會產生惱人嘅氣味。然而，LIFEBREATH過濾器則能有效地隔除有害嘅乙醛，保障車內各人健康，並能避免由乙醛所造成嘅臭味。
與過去只採用傳統活性碳嘅空氣過濾器唔同，萬事得LIFEBREATH更能隔除大量空氣懸浮物，尤其係乙醛；而佢重設有兩重過濾層：第一層用以隔除塵埃或粉末；第二層則用作隔除氧化氮（Nox）、碳氫化合物（HC）及一氧化碳（CO），而LIFEBREATH嘅最大功能，就係將吸入之乙醛轉化為無害粒子。