日本HipHop組合RIPSLYME喺日本好受歡迎，佢哋噚日重宣布今年七月會喺東京立川市國營昭和紀念公園搞個五萬人戶外騷，成為日本HipHop界一項紀錄。咁啱我大口羅拉剛剛買咗佢哋嘅DVD《SHORTCUTS！》，裏面除咗有MV同演唱會片段之外，fans重可以一睹RIPSLYME上年二月暢遊芬蘭嘅情況，其中成員SU一時興起，重大玩「夾何B仔」，比RobbieWilliams行快一步！
RIPSLYME上年初遠赴日本芬蘭混血兒成員ILMARI嘅故鄉芬蘭，佢哋喺台上除剩孖煙囪開騷，又順道玩snowboard，有姿勢有實際。
不過最頂癮嘅地方，係RIPSLYME五位成員夜麻麻圍住大毛巾一齊焗桑拿，之後佢哋又喺雪地浸冰水，最後只係得ILMARI夠膽身先士卒，不過佢就凍到呱呱叫！而上次來港穿着「現袋褲」嘅SU，除咗「夾何B仔」之外，重喺鏡頭前露全相，搞到畫面要打格仔！