呢個禮拜好波認真多，喺星期一睇完一輪英超、英甲賽事後，周中又有歐冠盃同埋歐洲足協盃；不過，無論有幾多場波，曼聯喺歐冠盃八強次回合迎戰皇家馬德里呢場，相信始終都係戲肉。
雖然曼聯喺首回合以一比三落敗，不過由於「紅魔鬼」近排個勢咁勁，唔少人（特別係曼聯躉同埋英國傳媒）都覺得佢哋有機會喺次回合，藉主場之利贏二比○兼晉級，重講到似層層咁。
兩隊都肯定有大量捧場客，不過我求大俠可以喺度先講個貼士畀大家，如果想買皇馬下盤嘅話，就唔好諗佢哋可以守和出線，因為好似施丹話齋：「我會為贏唔到巴塞同入唔到波作出補償，事實上禮拜三一戰，己隊肯定會入球滾滾。」事實皇馬全隊上下都話要喺奧脫福令曼聯失威，根本就係一心要贏波贏面子，所以捧佢哋不如博冷W重有分頭啦。
幾支英超聯球會近期放風話有意斟李華度，米杜士堡係其中一間。領隊麥卡倫都知道李華度人工太高係大問題，所以就想利用同係巴西人嘅祖連奴拉關係，幫手游說。我求大俠就覺得米堡畀唔起貴價人工，況且李華度踢法慢條斯理，似乎唔適合踢英超聯喎！
朗拿甸奴一早被傳會離開巴黎聖日耳門，睇嚟季尾都會變成事實，事關佢上周六對南特時，唔滿意俾教練費南迪斯中途調走，同教練發生爭執。「細哨」今季唔只一次同教練爭拗，曼聯就有球探睇呢場波，見到呢單嘢，都係時候出手，免得俾其他球會爭高個價位。
隨住季後賽開打，選秀日子亦愈嚟愈近。一路被人話鐵定係新人狀元嘅勒邦占士噚日就專登走去睇魔術對活塞嘅比賽，比賽時「TMAC」麥基迪有球好靚嘅單手入樽，勒邦占士就話自己做唔到。睇嚟佢雖被人捧到上天，但肯嚟學嘢，又虛心話自己力有不逮，都算幾難得。
足球界潮流之父碧咸最近戴咗隻售價三萬六千鎊（約四十四萬港元）嘅Jacob&Co嘅鑲鑽名表，搞到兩個後輩真拿斯同戴亞都去買番隻；不過，佢哋只係買咗隻七千鎊冇鑲鑽嘅同款表。我求大俠就覺得七千鎊唔係小錢，後生仔唔好咁貪慕虛榮。
入到季後賽，好多比賽總分都開上盤，就算噚日魔術對住出名防守硬淨嘅活塞都唔例外。據我求大俠觀察所見，最大原因可能係今年幾支出名以防守為主嘅球隊，如76人同溜馬都變到比之前更注重攞分，加上重有網隊、公鹿同魔術呢啲出名「Run&Gun」嘅球隊，咁樣打法自然場場都大手交易喇！