這間店舖表面上與其他茶餐廳沒啥分別，由侍應至裝潢都說不出特別之處，但唯一亦是最大的不同處相信就是由十二歲開始學藝的老闆陳永南，他給我第一個印象就是充滿自信，經歷過多年風風雨雨，都未試過失業。一個月前陳先生開始他的點心餐廳事業，可惜無幾耐就遇上呢場非典型肺炎瘟疫，但他深信仍會如以前一樣，可以順利度過逆境。
記者：黃思濃
攝影：楊錦文、黃思濃
自灣仔這間點心茶餐廳開業，陳永南已經滿腹大志，以為會開始自己事業的新一頁，以為可以從平租金、低人工的有利條件下開舖，一定有美好的將來，沒想過一個肺炎病會令香港變得如此慘淡。不過對於一位已經有三十五年經驗嘅點心師傅來說，卻一直沒有任何怯場，反而令他更加「精打細算」，將節省落嚟嘅成本回饋給顧客，加上自己向來質優的點心。大逆市？未驚過！
雖然百業蕭條，但陳師傅覺得啲人始終都要出嚟食飯，「我就為佢哋設計『知慳識儉』嘅早午晚餐和下午茶，畀大家食得夠美味、夠乾淨、夠營養，而且要夠經濟，比佢哋自己買餸煮重要平。」那麼明白顧客的心態，難怪餐廳開業短短一個多月，已經有好多熟客捧場，陳師傅好滿足現時的生意額。小記不禁要問：「牛肉、燒賣賣六蚊；雞扎、蝦餃賣八蚊，排骨飯、蝦腸都係十蚊一碟，咁嘅價錢，點賺呀？」
細問之下，原來又係背後嘅女人！陳太現職文員，但晨早同收工都幫陳生到街市入貨，以家庭主婦慣有嘅常識精挑細選，搵啲平靚正嘅貨，既可控制成本又能保證質量。陳師傅話：「我呢個人，一世夠運，有老婆幫我手，又跟過三位大師傅，帶我喺好多間享負盛名嘅酒樓做過，所以我今日先至咁有信心推出咁平嘅六蚊點心。」
至今陳師傅仍然好感激收佢做徒弟嘅杜爵、何慶雲和譚泗啟等三位大廚師，由佢入行「啟蒙」以至過去三十多年曾經任職富年華、國際酒樓集團、彩龍、百樂等，加上曾到過廣州惠如酒樓學藝，怪不得他滿腹自信！
在眾多食品中，陳師傅特別推介我試食佢親自炮製嘅「懷舊雞球大包」，話雞球一點也沒誇大，皮薄足餡，令人頓時想起兒時年代那些真材實料、大如手掌、只在以前的大酒樓才吃到的大包！特別響今時今日大倒退「逆市」又兼逢「春瘟」嘅艱苦日子裏，有一個咁實惠嘅大包，好多老香港都趨之若鶩，梗係要幫襯啦。
記得細細個跟住舅父去到茶樓，最鍾意嗌嘅就係香噴噴嘅大包，認真皮薄餡靚，一個大包就好似𠵱家啲細路哥夢寐以求嘅巨無霸一樣，再加埋$6碟雞扎同$10碟鮮蝦腸粉，淨係食呢幾碟已經飽晒！
碧綠鳳花枝$20(下)
唔好以為$20就一定會將價就貨，亦都唔好以為做採訪先整到大大碟，其實佢哋$20嘅小菜碟碟都足料兼且大大嚿，尤其係嗰個椒鹽骨。
蓮藕片炒腩肉$20(下)
若果你唔係飲酒一族，呢兩味就一定唔可以錯過，雞粒煲上枱時熱到起晒泡，只聞到陣陣鹹魚香直撲鼻內，小記就較鍾意叫多碟辣椒醬點腩肉，送飯最正！
平價實錄
呢圍客人嗌咗八味餸，全部掃清光，最抵食係菜價每款二十蚊，晚市茶芥全免，啤酒汽水唔貴，八個人AA制埋單，每人三十蚊有找，重抵過食晏！
美味居點心茶餐廳
電話：25275520
地址：灣仔莊士敦道船街一至七號寶業大廈3至4號舖
優惠時間：清晨5點至上午11點（點心）、晚上6點至11點（小菜）