我大口羅拉可以話係睇住靚女Sonim由身為二人組合EEJump嘅成員，到𠵱家個人發展捱出頭來，前幾日佢先啱啱推出全新細碟《東京MidnightLoneliness》，自然要密密出動增加曝光率啦！自首張個人細碟《咖喱飯之女》開始轉行性感嘅Sonim，最近又擺出一副風塵女子嘅打扮，為日本雜誌影寫真，冧吓男fans。
我羅拉仍然好記得Sonim最初作個人發展嗰陣，都話自己喺唔係好願意嘅情況之下，被迫轉行性感，佢上個星期又再喺日本成人雜誌《Flash》出現，專登化到成個風塵女子咁喺大阪行街影寫真。
𠵱家擺性感甫士非常熟手嘅Sonim，着咗件藍色透視裝，隱約露出入面個黑色繡花bra出嚟，加埋露吓小蠻腰，的確引死好多麻甩佬。Sonim之後又換咗套粉紅色露背裝，風塵味更上一層樓，重出動埋「跌帶裙」，去到日式傳統食肆影相，十足開工陪客咁款。
講真，雖然Sonim行性感好似食生菜，但大家細心睇吓佢憂鬱嘅眼神，都睇到佢仍然流露出完全都係為兩餐嘅無奈！