絲帶台噚日首次播NBA季後賽賽拓荒者作客小馬，雖然係錄播，但話晒都係今年嘅第一場NBA季後賽，我求大俠當然捧場啦！
喺上半場作客嘅拓荒者佔晒上風，半場時更領先成十分。到咗下半場，小馬開始發力狂追，搞到場波愈睇愈緊張，點知到最關鍵嘅第四節時，播咗頭兩、三分鐘就突然cut咗，勁播廣告同埋啲新聞摘要，到播番場波時，天啊！竟然已經喺比賽最後嘅分幾鐘，當時小馬已經領先成九分，大局已定，搞到我求大俠無晒癮！
雖然場波係錄播早預咗佢會cut部份片段，但係絲帶台無理由唔cut無關痛癢嘅上半場，反而cut咗最緊張嘅第四節，搞到我哋呢班追緊場波嘅觀眾個個睇到一肚火，有關方面，真係要認真檢討吓！
前晚有幾支歐冠盃八強分子，好似華倫西亞、米蘭雙雄同埋祖雲達斯等等都有「拉馬」迹象，但阿積士就無咁做，好清脆咁贏洛達四比二。不過尹達華特同埋麥士維兩件中場主將都勇戰受傷，前者如無意外踢唔到禮拜三對AC米蘭場生死戰，代價好似大啲喎。
提起AC米蘭，佢哋明顯着緊歐冠盃多過聯賽，前日主場「失豬」畀安玻里就擺明留力，直到遲遲扳平唔到至捨得落番射手舒夫真高。前日係李華度三十一歲牛一，難得踢正選但表現差。聽聞賽後有記者想訪問佢，佢一言不發好無癮咁行開，睇怕呢個生日都唔慌開心。
歐冠盃八強分子就留力，至於好似羅馬呢類漫無目的嘅球隊直頭比賽態度欠奉。睇羅馬前晚輸畀祖記場波，球員擺明唔夠戰意，淨係睇托迪踢吓波都識笑就唔開胃，結果下盤客想唔焦頭爛額都唔得啦。對於呢啲已經完成今季目標嘅球隊，我求大俠奉勸波友下注前要留神。
啱啱代替泰簡拿執教富咸嘅替工高文，一上場就帶領隊波反勝紐卡素二比一，都算好腳頭。佢賽後話打算「撥個輪」畀泰簡拿，同呢位老友分享贏波喜悅。不過佢話唔會全職教落去。查實富咸千瘡百孔，老細阿法耶茲又難服侍，換轉我求大俠都唔制啦。
韋斯咸降班危機深重，你估邊個最心涼？之唔係前季俾韋斯咸炒魷嘅領隊哈利列納囉。老列納好爭氣，帶領甲組樸茨茅夫來季肯定升番上超聯。喺韋斯咸咁頹，好有降班機會嘅時候，佢竟然話想力邀今季唔受韋斯咸重用嘅前鋒迪肯尼奧過檔，擺明彈韋斯咸唔識用人啫。