消閒小說之中，左丁山認為國際間諜鬥智小說，最為過癮。間諜唔係占士邦，好多時只係無名小卒，人工少、風險大，死咗都唔知乜事，不過我哋鍾意睇占士邦打得玩得，生活豪華，日日有美女陪伴，而且還唔死得，讀者睇到有代入感，過癮到震。
最近睇英文報紙，IHT轉載《紐約時報》嘅「雙重間諜案件」，嘩，好睇過小說喎，唔追唔得。呢件案嘅主角係洛杉磯一個華裔女士，名KatrinaLeung（梁女士）及梁女士嘅FBI接頭人JamesSmith。呢位史密夫與梁女士有長期親密關係。
該位梁女士自一九八三年起成為FBI線人，二十年來一共收咗一百七十萬美元做線人費，專係提供中國敏感資料畀FBI。點解佢有呢啲資料呢？現在大家都唔知，但佢自己話前國家主席楊尚昆喜歡佢，又收過中方十萬美元！現在FBI控告佢為中國情報線人，將美國特務行蹤洩露畀中國，危害國家安全。其實呢位女士喺一九九一年受過FBI懷疑，一位三藩市特工WilliamCleveland負責調查，但後來查查吓，查到兩個人上埋床，件事不了了之。FBI話梁女士畀貼士中國，提醒中國特工，關於江澤民專用波音七六七飛機在美國進行內部裝修期間，畀美國秘密裝上偷聽器一事。嘩，淨係法庭聆訊，已經透露咁多料，內裏唔知有幾多嘢冇講出嚟。你話美國攻打伊拉克之前，喺薩達姆身邊做咗幾多工夫呢！