我羅新基細個時都發過夢揸哈利，不過𠵱家哈利車就買唔成，哈利手機就有機會買得到，因為Motorola趁住今年哈利100周年紀念特登出咗部V60i哈利紀念版，個餡就冇乜分別，但個樣就夠晒Cool，哈利Logo加上黑皮面。不過呢部特別版只係美國哈利Dealer先有得賣，想買就要搵美國朋友幫幫手。
啱啱過咗幾日復活節假，雖然肺炎菌照樣橫行，不過手機場經歷復活節假期嘅洗禮，亦都開始「復活」，見番到人頭湧湧嘅場面，但係老闆們就慨歎睇嘅多買嘅少，不過點都好啦，個場旺始終總比冷清清好。
𠵱家香港百業蕭條，各大手機商都按兵不動，有新機都唔出住，搞到手機場都鬼咁靜。但係老闆就同羅新基講，三星部T408同T308就照樣好好賣，日日都賣4、5部，價錢唔貴兼且芒正和弦靚，講到羅新基都好似覺得自己賣緊廣告咁，不過實情又真係咁。
文：羅新基