打機樂園：
微軟繼續放水　力谷新XBOX

預覽全球最大GameShow
話咁快又到一年一度嘅E3遊戲展舉辦日期，呢個全球最大型嘅GameShow，各廠商都會傾全力盡Show旗下勁作。而係正式開幕日前，照例有好多大大小小真實消息同傳聞流出嚟，今日就為大家率先預覽一下嚟緊下半年Game界有咩搞作，齋睇新Game名單已經足以令機迷血脈賁張。

記者：徐影龍

XBOX新型號即將登場
要數近日網上流傳得最厲害嘅係微軟新型號XBOX。呢部名為XBOXLite嘅新機，雖有幾個唔同預想圖版本，不過都係集中重點改良機身尺寸，以縮細20%至30%為目標。另外亦有傳機內硬件配置有變，如硬碟容量增加、火牛抽離機外、再度減價等。最正係主力賣點XBOXLIVE相關配件將內置機內，玩時只需插入HeadSet就得。

兩大勁作續集
暫時已知XBOX將主力集中催谷六隻新Game，最矚目係《HALO2》及《PGR2》兩款大作。《HALO2》已經開發咗一段時間，不過消息一直較為神秘，連官方網站放出嘅相片都未有更新過，今次E3終可一窺乾坤，更有機會即場試玩。《PGR2》消息較多，暫時知道會新加入超過50部夢幻靚車，新加城市賽道有蘇格蘭同香港，對應XBOXLIVE網上對戰，大有實力挑經典作《GT4》。

任天堂又有新機？
另一網上流傳嘅任天堂新主機相片，取名為NEXUS，十足十N64後繼機，兼具多款鮮色機身。主處理器採用IBMG4嘅GekkoII（2.07GHz）及ATIFlipperII顯示晶片。手掣採用RF無線電波作無線操控，內置GameBoyPlayer，可直插GB/GBA遊戲帶。雖然整體可信度頗低，不過從3D設計圖到詳盡規格表，無聊得嚟又幾認真喎。
遊戲軟件方面，CAPCOM展館肯定有《BioHazard4》嘅最新影片，不過仍未確定會否提供試玩。任天堂自家招牌作除《大金剛》外，最矚目係同世嘉合作嘅《F-ZeroGC》。未來賽車主題，標榜爽快之速度感及剌激賽道，兩大陣營聯手，相信畫面及遊戲性均不容置疑。

PS2《GT4》確定加入香港賽道
據聞PS3最快都要2005年先面世，PS2重有排玩，所以仍以軟件大作為重心。今年重點將為《GT4》，確定「GT之父」落實上年對港人嘅承諾，首度加入香港賽道，可惜暫時仍未知採用哪條街道，今次支援網上對戰功能，機迷可24小時較技。到時重有製作人現身及專訪，咁大搞作，相信可即場試玩嘅機會好高。