喺今屆美國紐約國際車展上，凌志展出咗糅合豪華SUV及高性能房車概念於一身嘅HPX概念車，因而備受在場車迷注視；而佳特力亦展出走高性能路線嘅CTS-V，同樣惹來不少掌聲呢！
糅合豪華SUV，以及高性能房車概念於一身嘅凌志HPX概念車，可算係在場備受注視嘅參展車輛之一，並有機會成為日後新款SUV嘅藍本㖭！而呢部HPX外形線條吸引不特止，襯以四輪21吋跑車合金胎軨組合，望落重帶有一份跑車味道呢！車內座椅除能讓你坐得妥貼舒適外，乘客更可透過設於車內嘅LCD屏幕，觀看DVD電影㖭！機械配搭則與現有於美國當地發售嘅GS430型號相近，配用一台4.3公升V8偈，馬力輸出高達300匹。
呢款將會於今年第四季推出嘅佳特力CTS-V，相信會係該廠近年得意之作；造型極具高性能跑車韻味，當中全車包圍及18吋跑車合金胎軨組合，就最能夠將呢個特點展露出來。除車廂設備配搭方便易用外，就連一台5.7公升V8引擎，所迸發出嘅400匹馬力，更教人印象難忘，輔以一套6前速手動波箱，性能表現可謂十分出色。
Hybrid車種可算係現時汽車潮流之一，除豐田Prius及本田CivicHybrid等車款外，福特汽車亦於今屆紐約車展上，展出全新EscapeHybrid；此車造型與原有型號沒有太大分別，但內裏以一台2.3公升引擎加電馬達所組成嘅動力配搭，卻以慳油好力，與及低廢氣排放量見稱呢！
福特亦於車展會場上，公布有望於2005推出嘅全新Futura車系的資料；從畫家筆下嘅Futura車系預想圖中可以睇到，新車不僅造型流暢吸引，而且重略帶有於早前底特律車展上，所展出嘅427概念車的影子。然而，廠方亦預計會為Futura車系，裝配2.0、2.3及3.0公升引擎，以切合不同用家需要，稍後時間重會有採用Hybrid混合燃料引擎版本面世㖭！