同仇敵愾　憎死後藤真希
松浦、藤本做知心友

松浦亞彌同藤本美貴，呢對號稱擁有日本大半鍾意可愛型偶像fans嘅歌手，呢排先後推出水着寫真集，已經令fans大破慳囊，前幾日佢兩個再走埋一齊，推出一本日本人百看不厭嘅制服誘惑寫真，就更加係天下無敵啦！

性感欠奉
呢本《Ayaya同Mikitty》（即亞彌同美貴）入面總共有九個造型，分別係啦啦隊隊員、俏女傭、警察、OL、護士、忍者、天使、兔女郎同學生妹。雖然冇玩性感，但可愛表情做到足，fans同樣睇到心癢難耐，互攬嘅纏綿樣又再令人明白到Tatu嘅影響力。
不過我羅拉反而注意到亞彌同美貴影相時，都真係好friend，佢哋用聽筒互聽對方心口之餘，重要寫明「Ayayaismybestfriend」同「Mikittyismybestfriend」，似乎係畀說話後藤真希聽喎！亞彌美貴同後藤唔妥嘅傳聞成日有人講，而佢哋三個人嘅組合「GAMATTO」，出咗一隻細碟後就冇晒聲氣，聽講就係因為亞彌同美貴都當後藤係死敵，唔怪得佢兩個咁啱key。