發哥很愛香港這個家，不用開工的日子，他會盡量留在香港生活。最近這個家面臨前所未有的困難時刻，令港人士氣低沉，發哥勉勵港人說：「我同好多香港人一樣，感受到財爺預算案對普羅大眾造成負擔，非典型肺炎又令大家生活在惶恐之中，加上Leslie自殺，大家都好沮喪，但日子開心又咁過，唔開心都要過，呢個時候，大家應該要更加團結起嚟，成日去埋怨政府都於事無補，倒不如大家用積極態度去面對眼前嘅困難，我相信好日子總會重來。」
周潤發一直強調自己的成功，其妻陳薈蓮功不可沒，在發哥眼中的妻子既是愛人，亦是工作上的最佳夥伴，他笑說：「你知我個人幾大男人，但佢性格咁強都好就得我，喺屋企佢係好稱職嘅賢妻，喺事業上佢就係我一個好經理人同埋嚴厲嘅老師，佢得閒就讀英文畀我聽，我英文進步得咁快真係多得佢。
「你哋唔好以為我拍一部西片只係花嗰兩、三個月時間，其實開戲前幾個月，佢已經幫我一齊讀劇本，然後我自己再重睇成個劇本十幾次，跟住會將幾十頁厚嘅劇本抄幾次，咁讀劇本會易啲入腦，之後英文老師會再飛嚟香港同我對稿，單係一部戲嘅事前準備，最少要花我差唔多半年時間，我細個讀書都唔會有咁嘅耐性同咁勤力，因為自己真係好鍾意演員呢份工作，先可以肯咁樣付出。」
訪問接近尾聲時，發哥收到消息指他的母親腳患復發，他即時放下一切，駕車到港島區母親的寓所接她到養和看醫生。
發哥走後，發嫂說：「發仔好孝順，近幾年因為我哋兩公婆成日唔喺香港，所以奶奶搬咗去港島區，住喺發仔個妹附近，方便照應，但發仔喺香港嘅話，每日最少都會同奶奶通一次電話，每個禮拜點忙都會抽時間陪佢飲茶同食飯，呢排非典型肺炎咁恐怖，老公就成日問住佢嘅身體狀況，如果有乜頭暈身熱，就第一時間車佢去睇醫生，老公真係好緊張佢個媽咪。」
