每個藝人都會經歷事業的高潮期和低潮期，身經百戰的發哥亦一早做足了心理準備，他說：「咁多年嚟我由電視台嘅紅小生到初入影壇變成票房毒藥，然後一部《英雄本色》又將我變成票房靈藥。
「之後我放棄香港嘅一切，嗰時我一句英文都唔識就走咗去美國闖，頭兩年冇戲拍完全冇收入，後尾拍咗第一部西片《血仍未冷》，票房麻麻，但我都冇放棄過打入荷李活市場嘅決心，終於畀我遇到一部《臥虎藏龍》，重喺美國大收，到最近我第四部西片《刀槍不入一僧侶》上映，唔理票房係點，我覺得自己此生已無憾，試問有幾多個華人演員可以有咁多機會？」
發哥說：「做人一定要識感恩，我入咗呢行咁多年，可以有一大班影迷支持咗自己咁耐，陪住自己成長，我真係好感動，所以喺街度，有影迷叫我簽名影相，我會盡量滿足佢哋，因為冇咗佢哋，自己唔會有今日。將來有一日，我要由高峯滑下，我會欣然接受，因為藝人好難長期處於高峯，𠵱家我只係追求平淡而安逸嘅生活，只要有工開就開心。」