最近董太以一身連醫護人員都羨慕嘅保護衣出巡牛頭角下邨，叫人「洗手、洗手、洗手」，不但普羅市民歎為觀止，連班商界及政界人物都睇到目瞪口呆。有商界猛人同八方講，最近政商界睇見董氏伉儷咁紅，同佢哋起咗新花名，就係「鹼水糭」同「提款機」。
鹼水糭自然係話紮到成隻糭咁嘅董太啦，但點解係鹼水糭，唔係鹹肉糭？老友陰陰嘴咁笑住話：「鹹肉糭入面有（餡）料，鹼水糭入面就冇料到。」佢重話鹼水糭入面得糯米，完全合乎有人「食塞米」嘅個性。
而老董就梗係提款機，但佢係一部「政治提款機」。政界老友話，𠵱家邊個想拎政治本錢，「最好就係去『㩒』老董啦！」但當然要係佢老友，先有機會「㩒機」，好似之前佢老朋友陳永棋，一㩒就㩒咗幾億做中小企基金，最近就有李業廣，不過阿董今次唔喺自己個「政治戶口」㩒錢，反而要佢位「政治負資產」嘅阿松成全李業廣。
至於呢排㩒阿董㩒得最密，就非兩位行會黨魁田少同曾主席莫屬，不過老友話想借八方提吓田少，佢雖然有張「行會白金卡」，但㩒得咁狼，好易俾人「釘卡」！
傳真︰2623-9278
電郵︰