日產汽車於今屆美國紐約車展上，展出咗新款350ZRoadster開篷跑車，頓時惹來不少車迷注視；而瑞典紳寶汽車亦於會場內，宣布將於明年春季推出全新9-2車系，以爭取更高市場佔有率。不如𠵱家就一齊嚟睇睇，呢批惹人注目新車嘅風采啦！
備受車迷注目嘅全新日產350ZRoadster開篷跑車，終在今屆車展會場內亮相，並會於今年夏季推出；全新350ZRoadster依舊保留原來硬頂版嘅神髓，跑格十足之餘，改配電動軟篷頂後更增添一份誘人魅力。機械配搭方面，廠方會為新車安排一台編號VQ35DE嘅3.5升V6引擎（287匹）作動力來源，輔以一套6前速CloseRatio手波或5前速自動波，性能表現絕對毋庸置疑。
而豐田車廠亦不甘示弱，推出全新CamrySolaraCoupe；屬第二代嘅CamrySolaraCoupe，係由車廠美國有關部門負責設計，故外形望落頗具美國汽車色彩，但仍難掩一份跑車本色。而車廂配備亦見有跑味，加上齊全車廂配備，使用時十分方便。廠方亦會為新車安排兩台分別係直4及V6嘅引擎供選擇，當中一台3.3公升V6型號屬新配搭，馬力輸出更高達225匹，表現可謂十分出色。
於車展會場上，瑞典紳寶汽車宣布會於2004年春季，推出全新9-2車系；從廠方所公布嘅預想圖中可以睇到，新車會秉承原有紳寶車系嘅傳統，依舊充滿駕駛樂趣及擁有極具活力感嘅造型。然而，新車將以五門型號作主打，入門版更會以2.5公升直4偈作配搭，而頂級跑版則會裝配一台2.0公升直4Turbo偈。
於車展會場上展出嘅全新MercuryMariner，將會於明年正式登場；新車不僅擁有獨特吸引嘅造型設計外，車廂布局亦見有一份吸引性，而且重好切合佢SUV嘅形象㖭！另外，廠方亦為其安排有多個引擎配搭選擇，如2.3公升直4、3.0V6Duratec等等，梗有一款啱你㗎！
日產亦於車展會場內，展出全新PathfinderArmada；呢款全新嘅SUV擁有極具剛勁感嘅造型，望落好有吸引力之餘，就連車廂布局亦見靈活多變，絕能切合不同用家嘅需要。另外，新車將會用上一台全新5.6公升V8引擎，動力輸出強而有勁，定能迎合你所需呢！