非典型肺炎肆虐，港股經過一輪狂風掃落葉後，好多類股份已經走晒樣，尤其係航空股，更加無人敢沾手，有人話搭飛機好似入咗去毒氣室咁，認真誇張，但亦反映出人心惶惶嘅事實。喺咁嘅環境下，幾隻航空股嘅股價俾人踩到殘晒，好似隻國泰航空（293）咁，幾個星期以嚟就俾人由11蚊「隊」到落去最低8個3，雖然過去幾日已經番返上去8個8水平，不過埋單計都重係唔見咗兩成。有大行話隻股會見番8蚊樓下，睇嚟呢次大鐵鳥有排煩。
其他航空股亦唔見好得去邊，好似隻東方航空（670）咁，喺今次事件中都唔見咗一成多嘅市值，不過上個星期二就有件好奇怪嘅事發生。話說嗰朝早有公布，話東航客運量雖然急跌，但係貨運量反而急升，理論上呢單新聞最多只係值幾個仙（按：股價可以升幾個仙），但唔知發生乜事，喺嗰朝早開市前，有間大行落咗一個競價盤，買入5球幾嘅東航，最令人感到奇怪嘅重係，個價可以由之前一日8毫4，開市一升就升咗上去1蚊。
好多散戶以為有大盤入嚟買嘢，都蜂擁入市搶貨，不過最後唔單止再冇大盤出現，相反個價重愈跌愈有，以收市時計，股價由高位撻低咗一成一，破晒東航上市以嚟最大單日波幅。喺自由議價市場裏面，股價出現咁大幅度波動其實唔係乜嘢特別事，只不過呢單嘢好明顯係有人想搵班散戶出嚟接貨。如果今次呢單嘢冇人去調查又或者只係草草了事嘅話，就顯示出班自命係「股壇警察」嘅監管機構，對住班大行仍然係無計可施，咁搞法，遲早都會冇再信佢哋對市場嘅監管能力。
伏勝