2003年嘅當年圖片（PictureoftheYear）睇怕唔使選都係董太穿上全副保護裝備，喺牛頭角下邨嘅玉照，小市民睇到唔高興係你嘅事，但商界有頭有面之人居然對着鏡頭，公開嚴厲批評，就令人側目。個幾禮拜前，左丁山寫過工業家罵董，但係暗裏私下罵，對住左丁山罵特首，一啲都唔奇，好多分析師飲茶食飯時唉聲嘆氣，但一有電視電台訪問，佢哋點都會唱好，否則難以向老細交差，而老細又難以向特首交差也。
所以半島針織董事總經理林大輝公開批評董太，而且得到全場商界人士掌聲，決非小事，應知唐翔千唐英年父子係半島針織嘅老闆，唐英年去做工商及科技局局長，由重臣林大輝睇住檔攤，呢位林先生又曾攞過工業家獎，係四十歲世代嘅出色工業家，點解要冒得罪特首，令唐生尷尬之險，當住唐生面嚟痛罵第一夫人？鬧老闆嘅老闆嘅愛人喎，博乜呀。
一個解釋係「公私太分明」，信不信由你。以中國人嘅官場積習，大老細點都唔會信，工商界本來看風駛𢃇，支持董生連任，齊齊聽話挺董嘅，但「沙士」出現之後，眼見特區政府手忙腳亂，三司十一局各有各做，楊永強做到抽筋，李國章俾家長鬧，但孫明揚、廖秀冬等等人就失蹤，顯然就係阿頭領導無方，唔通「沙士」肆虐，房屋署管屋邨、食環署管街道街市清潔，就唔使配合咩？所以工商界高層普遍火都嚟埋，林大輝血氣方剛，勇敢地站出來而已。