腰圍30〞重着小背心？！
馮仁昭四圍超：莫可欣晒腩肉攞明𢱑撈

身為九三年港姐冠軍、又有個靚仔男友方中信嘅莫可欣，日前同表姐喺跑馬地睇樓，佢着住件吊帶背心，豬腩肉即刻湧現，尤其腰間嘅士啤胎，簡直可以將件背心迫爆。莫可欣咁嘅身形，睇嚟好快可以拍纖體廣告。

重一百三十磅
馮仁昭走埋去同莫可欣傾咗幾句，問佢𠵱家究竟幾多磅，佢話：「我𠵱家體重有成一百三十磅，腰圍都有三十吋，可能唔使幕前演出，加上平時又少運動，搞到個人放縱晒。我都希望將來可以拍纖體廣告，有錢賺又可以減肥，何樂而不為噃！」
其實張慧儀拍纖體廣告前，都着過類似款式嘅背心，展露佢嘅豬腩肉，莫可欣𠵱家又咁着法，睇嚟佢今次又係為拍纖體廣告鋪路。

余文樂Audi買咗好耐
有雜誌話余文樂同陳達志（Ba叔）不和，Ba叔重收番借余文樂用嘅Benz，余文樂於是自己買咗架Audi。噚日余文樂出席港台抗炎活動時，話架車其實買咗好耐，但以前畀屋企人用，自己去游水先至會揸架車，Ba叔只借過一次Benz畀佢，冇話收唔收番。佢重話上個禮拜先同Ba叔食過飯，根本就冇嘢。

四哥愛駒跑第三
呢排非典型肺炎咁犀利，少咗好多名人去馬場，但謝賢（四哥）一於冇有怕，佢噚日就去咗跑馬地馬場，四哥隻愛駒遊戲人生噚日有份出賽，重喺第四場跑第三，獎金有成四萬五千蚊。四哥開心到即刻張開對手，作狀攬住告東尼太太。

李彩樺口罩遮唇強攻眼妝
李彩樺噚日去咗港台出席抗炎活動，貪靚嘅佢雖然戴住個口罩，但佢嘅胭脂就襯番個粉紅色口罩。
李彩樺話：「因為要戴口罩，所以我都唔搽口唇膏，慳番唔少錢，呢排我主攻眼部化妝，買咗唔少睫毛液。」李彩樺重話遲啲要去內地拍劇，但為咗安全着想，佢會買定批口罩。

EO2成員肺炎疑雲
男子組合EO2噚日參與港台嘅抗炎騷，成員之一Eddie日前發燒，被懷疑患上非典型肺炎，Eddie話：「我扁桃腺有事啫，已經退咗燒，重休息咗四日。」問到EO2嘅隊員有冇探佢，Eddie就話：「探你滷味，人情冷暖得個冷字。」

翁嘉穗蒙面抱子入院
寶詠琴病情危殆入住港安醫院，成班記者即刻湧去港安採訪。點知等等吓竟然見到一個蒙面女超人，雖然佢戴住黑超同口罩，但都俾班記者認出佢係翁嘉穗，你都咪話唔犀利。原先馮仁昭以為翁嘉穗個仔帶咗口罩，但望真啲原來小朋友塊面貼咗膠布，翁嘉穗一落車就好緊張咁抱住個仔入咗醫院。